“Literaturaren irakaskuntza Bigarren Hezkuntzan. Irakasle literaturazaleon topaketa” egin zuten UEUren Udako Ikastaroen baitan joan den astean Baionan, Bernat Etxepare Lizeoan. Amaia Alvarez Uria (Bilbo, 1978) eta Katixa Dolhare Zaldunbide (Ezpeleta, 1982) aritu dira jardunaldiaren antolaketan eta haiekin aritu dira berbetan UEUko kideak. Egindako elkarrizketa atari honetan partekatzea interesgarria iruditu zaigu. Alvarez Euskal Filologian lizentziaduna da eta Literaturan doktorea. EHUko irakaslea da Hizkuntza eta Literaturaren Didaktika Sailean. Dolhare Frantziako agregazioduna da, Letretan, eta Literaturan doktorea. Bordeaux-Montaigne Unibertsitatean da irakasle, Euskal Ikasketak Sailean. Honakoa da elkarrizketa:

Zeintzuk dira Bigarren Hezkuntzako literaturaren irakaskuntzaren inguruan dauden aurreiritziak?

Gazteek ez dutela irakurtzen, ezin dela irakurtzera derrigortu, literatura gai sozialak eta emozioak lantzeko edo hizkuntza-gaitasuna hobetzeko bitarteko edo tresna hutsa dela, gazteek ez dutela maila linguistiko edo intelektual nahikoa klasikoak lantzeko, literatura zaharkituta dagoela eta ez dela gazteen interesekoa edo ez duela egungo errealitatea islatzeko balio… Literatura eta hezkuntza elkartzen direnean uste oker ugari agertzen dira.

Ipar eta Hego Euskal Herriko zenbait ikuspegi, marko eta jarduera partekatuko dituzue. Zeintzuk?

Euskal Herriko hiru administrazioetako curriculumak, metodologiak eta irakurgaien corpusak kontrastatuko ditugu, antzekotasunak eta desberdintasunak ezagutzeko eta eredu bateratu bat egon daitekeen ikusteko, dena ondo bidean, horretarantz urratsak elkarrekin egiteko.

Literaturaren irakaskuntzan lan egiten duten irakasleak saretzea ere bada helburua.

Bai, hori da. Beste gai edo ikuspegi batzuekin gertatzen den moduan, literaturarekin ere irakasle engaiatu eta zaletuak dira hori lantzeko eta ikasleengana hurbiltzeko pausoa ematen dutenak. Baina horrekin gertatu ohi dena da oso bakarrik egiten dutela lan irakasle literaturazale horiek. Izan ere, oro har, ikastetxe bakoitzean ez dira bat edo bi baino gehiago egoten horrelakoak. Hori dela-eta iruditu zaigu interesgarria elkartzea eta sarea egitea, ikastaro hau topagune bihurtuta.

Nori dago zuzenduta?

Zehazki Bigarren Hezkuntzan (edo Bigarren Hezkuntzan irakasle izango direnen prestakuntzan) dabiltzan literaturako irakasleentzat da. Baina, era berean, literaturaren irakaskuntzari buruz jardun nahi duen ororentzat ere bada.

Zerbait nabarmentzeko?

Udako Ikastaroen azken bi edizioetan gai hau landu izan da Seaskaren eta UEUren ekimenez eta horri jarraipena eman nahiko genioke. Hauek izan dira aurrekariak: “Euskal literaturaren irakaskuntza gogoetagai: tokikotasuna, lurraldetasuna eta kolektibo azpiratuak” (2023ko uztailaren 12an); “Euskara eta euskal literatura, programaketatik ikasgelara” (2024ko uztailaren 8an).

Iturria: www.ueu.eus