Uda garaia koloretako osagarriak sortzeko garai polita izaten da, eskumuturrak, orkatilak zein lepoak koloreztatzeko aukera polita emanez. Gaurkoan, modu erraz batean koloretako osagarriak egiten erakutsiko dizuegu. Guk pultsera bat sortu dugu.

Materiala:

  • Koloretako hariak
  • Artaziak
  • Arkatza
  • Kartoi zati bat

Pausuak

  1. Hasteko, euskarri bat sortu beharko dugu. Berau marrazteko, borobila den objektu bat erabiliko dugu. Guk zelo batekin marraztu dugu euskarria. Jarraian berau moztuko dugu.
  2. Ondoren, euskarriari 8 mozketa txiki egingo dizkiogu ertzetan. Mozketa batetik bestera neurri berdina utzi beharko da. Gainera, erdian zulo bat ere egingo dugu arkatzaren punta erabiliz.
  3. Euskarria prest daukagunean, pultsera egiten hasi aurretik, 7 hari zati moztu beharko ditugu. Guk kolore ezberdinetako hariak aukeratu ditugu. Hauek beraien artean lotu eta euskarriaren erditik sartuko ditugu.
  4. Hari zati bakoitza euskarriko mozketa batean jarri beharko dugu, 8 mozketatik bat libre geratu beharko delarik.
  5. Pultsera egiten hasteko ordua da. Libre geratzen den mozketatik eskuinera dagoen hirugarren haria bere mozketatik atera eta libre dagoen mozketan jarriko dugu. Pausu hau behin eta berriz jarraitu beharko dugu, nahi dugun neurriko pultsera osatu arte.
  6. Pultsera prest daukagunean euskarritik atera eta nahi dugun bezala erabiltzeko prest izango dugu. Animatu koloretako osagarriak sortzera!