Udako oporraldia bukatuta, iraila ikasturteko ohitura edo errutinetara bueltatzeko hilabetea izaten da umeendako eta gurasoendako. Era.eus egitasmotik ekarri dugu ikasturte hasierarako hausnarketa hau,

Ama eta aita askok seme-alabek ikasturte berrirako behar izanen dituzten gauzen zerrenda bat izaten dute, tartean, liburuak, eskolarako materiala, arropa berria eta bestelakoak. Horiez gain, garrantzi handia duen beste zerbait hartu behar da kontuan: gurasoek seme-alaben ikasketa prozesuan bidelagun izan behar dute, eta hizkuntza gaitasuna indartzeko tresnak eskaini behar dizkiete. Gogoan izan behar da zenbat eta euskara gehiago entzun eta hitz egin, orduan eta maila hobea lortzen dela, eta hori oso lagungarria izanen dela umeek ikastetxean landuko dituzten ikasgai guztietarako, eta bizitzako alor guztietan hizkuntza eroso erabiltzeko.

Hori dela eta, jarraian seme-alaben hizkuntza gaitasuna indartzeko gurasoek egin dezaketen ekintzen zerrenda bat proposatuko da:

  • Erabili euskara etxean: familia da hizkuntza batez jabetzeko eragilerik eraginkorrena. Hizkuntza batean eroso aritzeko egin daitekeen gauzarik onena egunerokoan erabiltzea da, eta familia eguneroko horren oinarri sendoenetako bat da.
  • Eskaini seme-alabei euskararekin lotutako bizipen aberatsak: posible izanez gero, umeei beren gustukoak diren jarduerak eskaini, euskaraz, esaterako, eskolaz kanpokoak.
  • Seme-alaben eskura jarri euskarazko kultur edukia: kultura hizkuntza gaitasuna sendotzeko tresna bikaina izateaz gain, sormena elikatzeko bitarteko aparta da. Nafarroako herri askotan eskaintzen dira euskarazko kultur jarduerak, eta horiek ERAko agendan ikus daitezke. Baina etxean ere gozatu daiteke kulturaz, adibidez, zinemaz, musikaz edo literaturaz, eta ERAko baliabide atalean ikus daiteke aukeraketa bat.
  • Euskarak seme-alaben bizitzan espazioa izateko, izan guraso aktibo: gurasoek oso egiteko garrantzitsua dute haurrek eskolaz kanpo pasatzen duten denbora tarte zabalean eginen duten ibilbidean. Umeen egunerokoan hainbat esparruk eragiten dute, esaterako, marrazki bizidunek, musikak, eskolaz kanpoko jarduerek eta beste hainbatek. Esparru horietan gaztelaniaren erakarmena handia da, eta, beraz, erabakiak hartzeko unean hizkuntzaren irizpidea kontuan hartzea funtsezkoa da euskarak tarte garrantzitsua izan dezan.
Ikasturte berrian izan hizkuntzarekiko guraso aktibo