MintzaOn, Ebete Aholkularitza Zerbitzuak ikasleei euskaraz hitz egiteko aukera gehiago emateko helburuarekin pandemia garaian sortu zuen egitasmoa da.

Eskolatik haratago; sarean eta jokoen bitartez, 5-7 pertsonako taldetan banatuta eta dinamizatzaile baten laguntzarekin, astean behin antolatzen diren 45 minutuko saioetan elkartzen dira hainbat ikasle. Horrela, euren MintzaOn taldeetan euskaraz aritzen dira, hizkuntza jolasak eta estrategiak, erronkak, tertuliak, musika eta interesatzen zaizkien beste gai batzuk partekatuz.

Hizkuntza arrakala “agerian”

Antolatzaileen esanetan, “pandemia garaia baino lehen ere ikasleen arteko hizkuntza arrakalak agerian zeuden, eta, ageriago gelditu dira pandemia garaian eta pandemia ostean”. Gainera, “eskola da euskara erabiltzeko edo entzuteko duten aukera eta eremu bakarrenetakoa”.

Ildo horretan, MintzaOn-ek “ikasleei euskaraz aritzeko beste aukera bat eskaintzen die, jolasaren bidez ahozko komunikazio gaitasuna indartuz”. Bestetik, pantailetan denbora pasako dutenez, ingurune horretan euskaraz ere hitz egin dezaketela konturatzeko ere balio duela uste dute.

Horregatik, 2022-2023 ikasturtean, jarraipena eman zioten egitasmoari, hiru herritan antolatuz –Gasteiz, Elgoibar eta Eibar– . Ikasturte honetan ere, Donostia edo Gasteizen adibidez, berriro jarri dute martxan MintzaOn, Udaletako Euskara Zerbitzuarekin elkarlanean.