Eusko Jaurlaritzaren datuen arabera, 2023-2024 ikasturtean baino 364 protokolo gehiago ireki ziren. Guztira, 522 eskola-jazarpen kasu baieztatu zituzten, martxan jarritako protokoloen %23a hain zuzen.

Begoña Pedrosa Hezkuntza sailburuaren ustez: “Detektatutako kasuen gorakadak erakusten du euskal hezkuntza-sistema inoiz baino prestatuago, adiago eta konprometituago dagoela”.

Bestetik, kasu hauek goiz detektatzeko, “Ikastetxeen, irakasleen, Ikuskaritzaren eta Berritzeguneen inplikazioa” nabarmendu du Hezkuntza Sailak. Horrek “protokoloekiko konfiantza indartzen duelako eta hobetu egiten duelako kasuak detektatzeko lana eta ikasleei eman beharreko laguntza”.

‘Zaintzea ere heztea da’ bideo-sorta

Bide horretan, Eskola Jazarpenaren aurkako Nazioarteko Egunaren harira, Zaintzea ere heztea da bideo-sorta zabaldu du Hezkuntza Sailak. Bertan, hezkuntza-komunitateko hainbat kide agertzen dira; esaterako, Aitziber Gomez Eguzkitza BHIko zuzendaria, Carmen Buzenchi Uribarri BHIko irakaslea, Eva Martinez Eusko Jaurlaritzako Hezkuntza Saileko ikuskaria eta eta Iñigo Ramos Berritzeguneko aholkularia.

Bideoak hemen ikus daitezke.

Erantzun “integrala”

Hezkuntza sailetik gogoratu dute ikastetxe guztietan daudela BAT taldeak eta Hezkuntza Ikuskaritzarekin eta Berritzeguneekin batera jarduten dutela. “Esku-hartze azkarra, diskretua eta teknikoki sendoa dena antolatzen da eta prozesu osoa dokumentatu egiten da trazabilitatea ziurtatzeko eta berriz biktimizatzea saihesteko”, adierazi dute.