Azaroaren 8an, larunbata,  Bizipozaren IX. Jardunaldiak ospatu zituzten Usurbilgo Sutegi Aretoan, Heriotzaren Pedagogia, begirada berri bat, beldurretik maitasunera lelopean. Bizipoza elkarteak, Hil Argi elkartearekin batera antolatutako topaketa honek ehun eta berrogeita hamar lagun bildu zituen, heriotzaren inguruko begirada berria sustatzeko asmoz.

Jardunaldiaren irekiera Agurtzane Solaberrieta Usurbilgo alkateak egin zuen, eta ondoren Leire Elizegik, Bizipoza elkarteko kudeatzaileak, eta Oihane Arriaranek Hil Argi elkarteko kideak, jardunaldien helburuei eta Gehiago Gara ekimenari buruz hitz egin zuten.

Mahai-inguruak goizean

Goizeko lehen saioan, Heriotzaren pedagogia ikastetxeetan izeneko mahai-inguruan, lau ikastetxeren esperientziak aurkeztu ziren, Hil Argi elkarteko kide den Nere Erkiagaren gidaritzapean.

Hasteko, Allende Salazar Herri Eskolan garatu dituzten protokoloa eta dinamika hezitzaileak aurkeztu zituen zuzendaritzako kide den Dorleta Gortazarrek, hala nola, Coco horma-irudia, Beti gure bihotzean proiektua, eta komunitate osoaren inplikazioa azpimarratu zuen. Ondoren, Gainzuri ikastetxeko ordezkari den Iñaki Imazek bere heriotza batzordearen esperientzia partekatu zuen.

Jarraian, Amassorrain Ikastolako zuzendariak, Maider Izagirrek gertutik bizitako heriotzek piztutako hausnarketa prozesua partekatu zuen. Amaitzeko, Antzuolako Eskolako Erkuden Iglesias gurasoak, esperientzia pertsonala partekatu zuen, doluaren prozesuan eskolaren eta komunitatearen babesa eta gertutasuna goraipatuz.

Hainbat elkarteren parte hartzea

Hamaiketakoaren eta talde argazkiaren ostean, Aspanogi, Iñurri, Naizen eta Txatxilipurdi elkarteek ere mahai-ingurua eskaini zuten, Amaia Agirreren gidaritzapean. Heriotzaren pedagogiak elkarteetan duen aplikazioari buruz hausnartu zuten.

Denek aipatu zuten heriotza tabua dela eta ez dutela erraza haien egunerokoan honen inguruan hitz egitea. Iñurri elkarteko Julene Illarramendik eta Aspanogi elkarteko Nekane Lekuonak oso gertutik bizitzen dute heriotza haien elkarteetan. Naizen elkarteko kide den Bea Severrek suizidioaz hitz egin zuen. Txatxilipurdi elkarteko Jone Ojeak berriz, heriotza gertutik bizi ez arren, orain arte gaia ez badute landu, tabuak tarteko izan dela adierazi zuen.

Jardunaldia Joxe Mari Agirretxeren mikro irekiarekin, Hil Argi elkarteko Nere Erkiagaren ondorioekin globoen jolasarekin amaitu zen. Bizipoza eta Hil Argi elkarteek adierazi dutenez, “Egunak agerian utzi zuen heriotzari buruz hitz egitea ez dela tristura iturri izan behar, bizitzaren parte dela, eta maitasunetik eta elkarlaguntzatik lantzeak indar eta bide berriak sortzen dituela komunitateetan”.