Eusko Jaurlaritzako Gazteen Euskal Behatokiak, Gazteak, sare sozialak eta informazioa txostena argitaratu du. Euskadiko 15 eta 29 urte bitarteko gazteen sare sozial ezberdinen erabilera-maiztasuna, eta gehien interesatzen zaizkien eduki-motak aztertzearekin batera, erabilera problematikoei buruzko informazioa ere jasotzen du txostenak. Besteak beste, sare sozialetan bizitako egoera desatseginak, ziberjazarpena, informatzeko erabiltzen dituzten sare sozialak eta albiste faltsuen edo fake news-en eraginpean zein puntutara arte dauden ikertu dute.

Sare sozialak informatzeko

Gazte gehienek (% 74,6) sare sozialen bidez jasotzen dute gaurkotasuneko albisteen berri, eta, arlo horretan instagram nabarmentzen da, gazteen %60,1ak erabiltzen du informazio iturri gisa. WhatsApp (% 41,0), TikTok (% 37,7), YouTube (% 22,0) eta X-era (% 20,7) ere jotzen dute.

Bestetik, gazteen herenak baino gehiagok egunero edo ia egunero izaten du albisteen berri telebista edo
online prentsaren bidez, baina ez dira gehienak. Nolanahi ere, erdiak baino gehiagok jotzen dute
informazio-iturri horietara gutxienez astean behin. Papereko prentsa da gazteek gutxien erabiltzen duten komunikabidea, %4,5ak bakarrik irakurtzen du egunero.

Bostetik batek jazarpenak jasan dituzte

Jazarpen kasuei dagokienez, bost gaztetik batek (% 21,6) esan du noizbait sare sozialetan jazarpena sentitu duela etengabe mezuak bidaltzen zizkion norbaitengatik. Gazteen % 2,1ek dio egoera hori askotan gertatu dela, eta % 19,5ek noizbait. Datuak kezkagarriak dira, baina, hala ere, sare sozialetan jazarpen-egoeraren bat bizi izan duten gazteen ehunekoa jaitsi egin da 2022an (%31.6 )eta 2023an (%29,3) erregistratutakoarekin alderatuta.

emakume gazteak gehiago sentitzen dira edo sentitu dira jazarriak sare sozialetan gizon gazteak baino (% 26,5 eta % 16,9, hurrenez hurren). Bestetik, jazarpen moten artean zabalduena sexu-jazarpena da. Gazteen % 14,6k adierazi du sare sozialetan sexu-jazarpena jasan duela. Beste % 11,1ek jazarpen matxista edo misoginoa bizi izan dutela diote, % 4,6k jazarpen homofoboa eta % 4,2k jazarpen arrazista edo xenofoboa.

Konektatuta bizi den gazteria

15 eta 29 urte bitarteko ia gazte guztiek erabiltzen dute egunero sare sozialen bat. (% 98,2) eta hamarretik zazpik erabiltzen dituzte hiru sare sozial baino gehiago. Bestetik, gazteek gehien erabiltzen dituzten sare sozialak berriz, Spotify, Instagram, YouTube eta TikTok dira.

Informazio guztia Eusko Jaurlaritzaren txostenean dago eskuragarri.