Gurasoak aktibatzeko ekimena da eta 0 eta 12 urte bitarteko gurasoengan jarriko du arreta taupa euskaltzaleen mugimenduak, nahiz eta aitortzen duen euskararen auziaren kezka “orokorra” dela.

Ekimena abenduaren 9an aurkeztuko dute, goizez eta arratsaldez, online bidez, eta ordubete inguruko iraupena izango dute bi hitzordu jarri dituzte aukeran: 10:00etan aurrena eta 18:00etan bigarrena. “Ekimenaren antolaketan aritzeko interesa duten herritarrak eta gaiarekin kezkatuta dauden gurasoak” gonbidatu nahi dituzte, eta izen ematea zabalik dago dagoeneko. Hemen egin daiteke.

Askotariko egoerak

Euskal Herriko txoko bakoitzeko egoera “ezberdina” dela dio Taupa mugimenduko kide Jon Zapatak. Hala ere, haur euskaldun guztiengan eragina duten hainbat faktore daude, hark dioenez: “Hezkuntza sistemaren bidez euskarara jasotzeko aukera gehien izan duen belaunaldia da, eta, ondorioz, haur eta gaztetxoen euskararen ezagutza nahiko orokortuta dago Euskal Herriko zenbait eremutan; EAEn, batez ere. Dena den, ezin dugu alde batera utzi hezkuntza sistemaren bidez ez dagoela bermatuta haurrek euskaraz aritzeko gaitasuna lortuko dutenik, beste hainbat faktore sartzen baitira jokoan”. Bestalde, Zapatak dio “euskarazko edukiak geroz eta eskurago ditugun arren beste hizkuntzetan sortzen diren edukiekin dagoen lehia inoiz baino bortitzagoa” dela. Eta, hortaz, haurrek kontsumitzen dituzten eduki asko “gaztelaniaz, frantsesez eta ingelesez” izaten direla. Horrez gain, “familien egoerari” arreta jartzea garrantzitsua dela dio Zapatak; izan ere, haurren inguru hurbilena “familiak” osatzen duela dio, eta, horregatik, “gurasoak interpelatzen ditu ekimenak”.

Kezka orokorra

Ekimena 0 eta 12 urte bitarteko haurren gurasoei zuzenduta badago ere, Zapatak dio euskararen erabileraren auzia ez dela “haurren kontua soilik. Hobeki esanda, helduon ardura da, batez ere”. Hurrengo belaunaldia euskaldunagoa izan nahi izatea “estrategia ona” dela dio mugimenduko kideak, baina, era berean, adierazi du ezin duela balio “helduok ditugun egin beharrak beste belaunaldi bati emateko”.

Haurren ingurua euskalduntzearen auziari helduta, Zapatak dio Taupak antolatutako ekimenak bi egiteko nagusitan jarriko duela arreta: “Batetik, sentsibilizazioari eta prestakuntzari dagokionez, haurren unibertsoan eragiteko tresnak, baliabideak eta edukiak sortu nahi ditugu, familien esku uzteko; bigarrenik, gurasoak eta haurrak batuko diren elkarguneak antolatuko dira Euskal Herriko hainbat eta hainbat txokotan”.