‘Hezkuntza antiarrazistaz hausnartzen’ izeneko formakuntza saioa emango dute Bergarako Seminarixoan, urtarrilaren 31an, larunbata, 10:00etatik 13:30era. Ndank ndank elkarteak antolatutako saioa hezkuntza komunitate osoari zuzenduta dago: gurasoei, hezitzaileei, irakasleei eta aisialdirako eragileei.

Formakuntzan, eguneroko praktiketan agertzen diren diskurtso arrazistak identifikatuko dira, baita horiei aurre egiteko estrategia pedagogikoak eskaini ere. Elkartetik adierazi dutenez, “diskurtso horiek indartzen ari direnean, hezkuntzak funtsezko papera du pentsamendu kritikoa, enpatia eta justizia soziala lantzeko”.

Amaia Jackson, Leyao Rovira eta Hajar Samadi izango dira hizlariak. Jacksonek eskoletan arrazakeria nola identifikatu azalduko du. Rovirak, Nola eragiten du zuri zabaltze ikuspegiak adopziozko identitate ez-zuriaren eraikuntzan? gaiaren inguruan jardungo du. Azkenik, Samadik, Eskolan bizikidetza inklusiboa sendotzeko gakoak eskainiko ditu. Saioan zehar, Elene Mengyu Larrinagaren Hogeita bat film laburra ere proiektatuko da. “Guztiok hezi gaituzte gizarte arrazista batean, eta, ondorioz, denok daukagu zer ikasi eta zer des-ikasi”, azaldu dute elkartetik.