Ertzetako gai eta errealitateak erdigunera eramatea helburu duen Bizipoza Eskola, Debagoieneko ikastetxeetan, hezkuntza ez formaleko eremuetan eta herrigintzako espazioetan abiarazteko erabakia hartu zuten martxoan, Fagorrek eta Bizipoza elkarteak hitzarmen bat sinatu ostean.

Martxotik hona, “barne lanetan” murgilduta egon dira; besteak beste, “Bizipoza Eskola baliabide didaktikoa bailarako hezkuntza arautu eta ez arautuko hezitzaile guztiei aurkezten, Zapotxin eta Pontx pailazoen laguntzarekin”. Orain, denbora horretan landutakoa kalera ateratzea da euren asmoa, eta Debagoieneko herrietan egingo dute hori. Herri bakoitzeko errealitatea berbera ez denez, proiektuaren forma aldatu egingo da herriz herri.

Eragileak aurkeztuko dituzte

Ertzetako gaiak lantzen dituzten herri bakoitzeko hainbat eragileren laguntza izan dute, eta, haien lana ezagutarazi eta hari balioa emateko, bideoak aurkezten hasi da Bizipoza elkartea sare sozialetan. Astelehenean Txatxilipurdirekin ekin zioten, eta astero-astero, astelehenero, bideo bat sareratuko dute.

Euskal Herri “inklusiboagoa” helburu

Bizipozaren helburu nagusia “denona eta denontzat beharko lukeen Euskal Herri inklusibo bat eraikitzea” da, “euskaratik eta euskaraz”, eta horregatik sortu dute Bizipoza Eskola, “pertsona ororentzat izango den mundu baterantz egiteko heziketa, baliabide eta tresnak biltzen eta eskaintzen dituena”. “Bizipoza Eskolak, batetik, gida didaktikoak jasotzen ditu bere baitan; bestetik, materiala du, elkarte hauek guztiek lantzen dituzten gaiak oinarri hartuta; azkenik, bada egutegi bat ere, gai hauek guztiak zein nazioarteko egunetan kokatuta dauden jasotzea dituena”, zioen Bizipoza Eskolaren koordinatzailea den Leire Elizegik, iazko maiatzean egindako aurkezpenean.

Horrenbestez, gizartearen ertzetan dauden hainbat gai ekarriko dira erdigunera, pertsona ororen eta pertsona ororentzako behar lukeen Debagoiena inklusiboa eraikitzeko. “Hor dauzkagu gaixotasun larriak ez ezik, aniztasun funtzionalak, heriotzaren pedagogia eta dolua, eta beste hainbeste gai, eta saiatuko gara zeharka begiratzen ditugun gai hauek plazaratzen eta elkarlanean denonak egiten, denon artean normalizatzen”.