Arizmendi ikastolak pasa den urtean jarri zuen martxan Magala espazioa Arrasateko uribarri auzoan. Espazio hau, herriko familiei arnasa, laguntza eta topagunea eskaintzeko helburuarekin sortu zen, batez ere 0-2 urte bitarteko haurrak dituzten gurasoen beharrei erantzuteko. Magala espazioaren hasiera, helburu eta egitasmoaren nondik norakoen berri eman digu Amaia Arrietak, espazioko arduradunak.

Iaz Magala goizez bakarrik irekitzen zuten 9:00–12:30ak bitarte, baina familien eskaerei erantzunez, aurten ordutegia 16:30ak arte zabaldu dute.

“Duela urte batzuk, familiek hainbat beharhelarazten zizkiguten. Herrian ia ez zegoen ume txikientzako estalpedun espaziorik: bakarra, oso txikia eta adin tarte zabalerako. Horrek zailtasunak sortzen zituen: haur oso txikiak baldin bazeuden, eta, aldi berean, haur handiagoak ere bertan baldin bazeuden, espazio hori ez zen erosoa izaten familientzat. Neguan, familiek kafetegietara joatea beste aukerarik ez zuten”.