Gipuzkoako Foru Aldundiaren arabera, gaur egun, 807 haur eta nerabe daude babes-neurriren baten pean lurraldean. Horietatik 67k harrera-familia bat behar dute eta 34k harrera familia espezializatua. “Familia-harrera babes-neurri bat da, babesgabetasun-egoeran dauden haur eta nerabeei familia-ingurune seguru eta egonkor batean hazteko aukera ematen diena, loturak berreraiki, bizi-proiektua garatu eta eguneroko bizitzatik ongizate integralerako beharrezkoak diren zaintza-esperientziak berreskuratu ahal izan ditzaten” nabarmendu dute Aldunditik.

Ildo horretan, Maite Peña Zainketa eta Gizarte Politiketako diputatuak azpimarratu du Gipuzkoan harrera-familia espezializatu berriak behar direla: “Babes-sistemaren barruko funtsezko baliabidea da, eta familia-ingurune egituratuak, egonkorrak eta profesionalki lagunduak eskaintzen dizkie haurrei”. Izan ere, Familia-harrera espezializatutzat hartzen da, “premia edo zirkunstantzia bereziak dituzten adingabeei laguntzeko kualifikazio, esperientzia eta prestakuntza espezifikoa duen kide bat gutxienez duen familia batean burutzen dena”.

Hainbat modalitate

Errealitate desberdinei erantzun ahal izateko, familia-harrerako hainbat modalitate daude Gipuzkoan. Harrera familia zabalean egin daiteke —adingabea bere familia-sareko kideek hartzen dutenean—, beste familia batean ere bai, aldez aurretik lotura biologikorik ez dagoenean. Harrereoi dagokienez, urgentziazkoak, aldi baterakoak edo iraunkorrak izan daitezke; haur bakoitzarentzat ezarritako administrazio-egoeraren eta esku hartzeko planaren arabera. Horien guztien artean, familia-harrera espezializatuak egoera konplexuenei erantzuten die.

ICAR lehiaketa deitu du Aldundiak

Imajinatu, Sortu, Artatu, Erreparatu lelopean, Gipuzkoako Aldundiak herritarrak “sentzibilitzatzeko” eta Familia Harrera Espezializatuko Programako parte hartzea “sustatzeko” helburua duen ICAR lehiaketa abiatu du. Hiru kategoria ditu lehiaketak: Prestakuntza-zentroen kategoria –gainbegiratutako talde lanak hartzen dituena–, kategoria profesionala eta kategoria orokorra –lurraldeko pertsonei zuzendutakoa–.

Hiru kategorien artean, sei sari banatuko dira; kategoria bakoitzeko bi eta opari-txartelak. Aldunditik adierazi dutenez, lelo edo logotipoak, irudi edo hiru minututik beherako bideo laburrak, eta hiru minututik beherako abestiak aurkeztu daitezke, euskaraz zein gaztelaniak. Lanak aurkezteko epea, martxoaren 15ean amaituko da eta epaileek apirilaren 12an emango dute sarituen berri. Sari banaketa, aldiz, apirilaren 22an izango da.

Bestetik, prozesuan zehar, aurrez arreko eta online informazio-saioak egingo dira, prestakuntza-zentroetan topaketak egitearekin batera. Programan parte hartu duten familia harreragileen eta gazteen testigantzak jasoko dituzte saioetan. “Lanak baloratuko dira familia-harrera espezializatuaren balioak transmititzeko gaitasunaren, programaren errealitatearekiko koherentziaren, sormenaren eta inpaktu emozionalaren arabera”, adierazi dute Aldunditik.