Aurtengo udan, Arbizu ARTbizu bilakatuko da eta Arte Eszeniko Udalekua hartuko du; izaera pedagogiko eta formatiboa duen udalekua, lurralde osoko haurrei irekita dagoena. Adinaren arabera banatutako bi txanda egingo dituzte Arbizuko Eko-Kanpingean. Proiektua Arima Projects sormen-zuzendaritza eta ekoizpen integraleko estudioak bultzatzen du, eta jarduera guztiak euskaraz egingo dituzte.

ARTbizu Arte Eszenikoen udalekua aurkeztu dute eta antolatzaileek diote ez dela aisialdiko “jarduera huts gisa ulertzen”, baizik eta “esperientzia hezitzaile integral gisa”, arte eszenikoetan oinarrituta. Egonaldi osoan zehar, parte-hartzaileek modu praktiko eta bizipenezkoan landuko dituzte hainbat diziplina: antzerkia, interpretazioa, gorputz-adierazpena, kantua, dantza, mugimendua, sorkuntza eszenikoa, atretzzoa eta baliabide multimedia, betiere akrobaziak, malabarrak eta natura-inguruneko jarduerak uztartuta.

Elkarbizitza oinarri

Ikaskuntza ez da eguneko une jakin batzuetara mugatzen, elkarbizitzan oinarritutako formatuari esker, eguneroko esperientziaren parte bihurtzen dela diote antolatzaileek. Gaineratu dute, horrela, “arte-lana” tresna bihurtzen dela “autonomia, sormena, komunikazioa, talde-lana eta konfiantza” bezalako
gaitasun pertsonal eta sozialak garatzeko.

Elkartrukea eta harremanak sustatzea

Udalekuaren helburu nagusietako bat da Euskal Herriko haurrak elkartzea, elkartrukea eta harremanak sustatuz, eta hizkuntza komun baten bidez: artea euskaraz.

Adinaren arabera, bi txanda egingo dituzte; uztailaren 20tik 26ra lehenengoa eta uztailaren 27tik abuztuaren 2ra bigarrena. Informazioa eta izen-emateak Arimaprojects.com-en.