• Gazteei zuzenduta dago eta helburu du online espazio osasuntsuagoa eta seguruagoa sortzea
  • Mundu birtualeko indarkeriak bat-batekoak, hiperkonektatuak eta anonimoak izaten dira

Deustuko Unibertsitateko Estibaliz Linaresek, Zaloa Lafuentek eta Iratxe Rodriguezek landu dute eta Emakundek argitaratu du. Jarri izena du izenburua eta mundu birtualeko indarkeriak identifikatzen eta izendatzen laguntzea du helburu. “Gidak ekarpen bat egiten du beharrezkoa den alfabetizazio digitalean, zenbait indarkeria mota antzeman ahal izateko”, azaldu du Emakundeko zuzendari Miren Elgarrestak.

Gazteei zuzendua

Gida gazteei zuzenduta dago, online espazio osasuntsuagoa eta seguruagoa sortzeko helburuarekin. “Manosferaren garaian, feminismoaren aurkako mezu-oldearen aurrean, inoiz baino garrantzitsuagoa da gazteei indarkeria detektatzeko eta horren aurrean nola jokatu jakiteko tresnak eskaintzea”, azpimarratu dute bultzatzaileek. “Ziberindarkeria ez dago Internetetik kanpoko indarkeriatik deskonektatuta. Ez da fenomeno isolatu bat, baizik eta berdintasun ezaren eta emakumeen aurkako egiturazko indarkeriaren gizarte-testuinguru zabalago batean kokatzen da, mendeetan zehar iraun duena eta konektibitatearen aroan jarraitzen duena”.

Bat-batekoa eta anonimoa

Indarkeria guztiak erro berdinetik datozen arren, mundu birtualean indarkeria bat-batekoak, hiperkonektatuak eta anonimoak dira. Anonimotasuna da sareen arriskuetako bat, baita haien irismena eta hedapen azkarra ere.

Deustuko Unibertsitateko irakasle Estibaliz Linaresek gidak identifikatzen dituen ziberindarkeria matxisten motak errepasatu ditu. Adibidez, Ziber-jazarpen sexista, emakumeen aurkako irain eta mezuetan adierazten dena; Ziber-sexu-jazarpena, eduki sexuala duten argazkiak zabaltzeko mehatxua egiten denean; Gaslighting edo manipulazio emozionala, biktimari bere bertsioa zalantzan jartzeko; Grooming, gizon heldu batek adingabe batekin harreman bat ezartzen duenean hura sexualizatzeko helburuarekin; ziber-kontrola, beste pertsona baten sare sozialak kontrolatzeari dagokionez; Body shaming, idealak hausten dituzten gorputzen aurkako iruzkinak eta irainak zabaltzen direnean.

Gidak aholkuak eta irtenbideak eskaintzen ditu biktima izan daitezkeenentzat. Gizonezkoei, berriz, jarraibide batzuk ematen dizkie ziberindarkeria geldiarazten laguntzeko. Jarri izena gida EAEko ikastetxeetan eta gazteentzako aisialdi-zentroetan banatuko da. Gainera, esteka honetan eskuratu daiteke.