Udako oporrak haurrentzat atseden, jolas eta abenturarako sasoia dira. Eskolako errutinatik kanpo, aisialdiak garrantzi handia hartzen du, eta euskarazko udalekuak aukera paregabea dira denbora libre hori modu aberasgarrian bizitzeko. Udalekuetan, haurrek lagun berriak egiten dituzte, naturaz gozatzen dute eta jarduera ezberdinak egiten dituzte, dena euskaraz eta giro gozagarrian.

Zer dute udalekuek berriz ere joan nahi izateko? Erantzuna sinplea da: esperientziak. Abenturak, erronkak, gaubelak, txangoak, kirola, jolasak eta taldeko bizikidetza biziak dira, eta oroitzapen horiek urte osoan gogoan izaten dituzte. Esperientzia horiek gainera, gurasoen babesetik harago, autonomia, konfiantza eta autoestimua garatzeko oso lagungarriak izan daitezke.

Hizkuntzaren ikuspegitik, udalekuek balio berezia dute. Haurrek euskaraz bizi dute egunerokoa: jolasean, otorduetan, atsedenaldietan eta jardueretan. Horrela, euskara bizipen positiboekin lotzen dute, eta horrek hizkuntzarekiko motibazioa eta erabilera indartzen ditu.

Azken urteotan euskarazko udalekuen eskaintza nabarmen ugaritu da: naturan murgiltzeko udalekuak, kirolarekin lotutakoak, ur ekintzetakoak, bertso udalekuak, mendiko edo itsasoko egonaldiak, ibiltariak… Aukera zabala dago haur bakoitzaren interesetara egokitzeko.

Gurasoen erabakia giltzarria da haurrek opor garaian egingo duten ibilbidea marrazteko. Hizkuntza ez da bakarrik eskolan ikasten; izan ere, sozializazioa, orotariko bizipenak eta esperientziak dira ikaskuntzaren oinarri.

Hona HEMEN aurtengo euskarazko udalekuen zerrenda. Kokapen, data, prezio, adin eta gai askotariko eskaintza aurki daiteke bertan.

Era.eus egitasmoan argitaratutako edukia da hau.

Txatxilipurdi elkarteak ere antolatzen ditugu udaleku itxiak.

Ingou tril aurtengo Txatxilipurdiko udaleku itxietan be?

Txatxilipurdi elkartean, aisialdi hezitzaile euskalduna lantzen dugu eta bizitzarako behar ditugun balore eta gaitasunak garatzen laguntzen dugu, hala nola, euskaltzaletasuna, parte hartzea, autonomia, naturarekin harremana, aniztasuna eta feminismoa.

Gure udaleku itxiek ere balore hauetatik edaten dute, betiere nerabeak eta gozamena oinarri izanik.

Zaintza erdigunean jarriz, pertsonen ahalduntzean, garapen pertsonalean eta tratu onetan oinarritutako udalekuak antolatzen ditugu, talde harreman zaindu baten bitartez, nahiei eta ametsei ere leku eginez.

Horrez gain, uda garaian aisiaz gozatzeko, egunerokotasunetik irtenda esperientzia berriak bizitzeko eta harreman berriak egiteko bitarteko aproposak dira.

Aurten ere, azken urteetan zehar egin dugun bezala, Arrasatetik abiatuta, Euskal Herriko aurre-nerabe eta nerabeei udaldi magiko eta ahaztezin bat eskaini nahi diegu.

Euskaraz, naturaz, sormenaz, bizikidetzaz, elkartasunaz eta talde lanaz bustitako oporraldi paregabeak merezi dituztelako.

Zarena zarela, gozamena oinarri, nahiei eta ametsei elkarrekin leku egingo diegu! Ingou tril Txatxilipurdiko udalekuetan?

Udaleku itxien deskribapena

2026ko udaleku itxiak 9 eta 18 urte bitarteko nerabeei daude zuzenduta eta hiru eskaintza antolatu ditugu.

Alde batetik, uztailaren 4tik 11ra bitarte, GaraiOn-en (Ozaeta, Araba) zortzi eguneko kanpaldia antolatu dugu.

Bi adin tarte ezberdinek osatuko dute udaleku itxi hau eta adin tarte bakoitzak bere herrixka propioa izango du GaraiOn-en (lo leku, elkargune eta jolas eremu propioaz osatua). Udalekuak abenturaz beteta eta giro goxoan pasatzea nahi dugu. Elkar zaintza izango da ardatz garrantzitsuetako bat eta udalekuetan parte hartuko dugun kideon hitza kontuan izanik adostuko dira ekintzak.  

Adinaren arabera izendatuko ditugun taldeak hauek dira:

  • AIZKOMENDI HERRIXKA (LH 4, 5 eta 6 mailak, 9-12 urte bitartekoak (2014-2015-2016 urteetan jaiotakoak) 350€ / 30 plaza
  • GEBARA HERRIXKA (DBH 1eta 2 mailak, 12-14 urte bitartekoak  (2012 eta 2013 urteetan jaiotakoak) 350€ / 30 plaza

Bestetik, Kosta ala Kosta udaleku ibiltaria izango dugu, ekainaren 28tik uztailaren 5era. Abentura hau Bergaran hasi eta Gipuzkoako mendiak zeharkatuz, Mutrikuko kostara iritsiko gara. Hemen ere zaintza izango da ardatz nagusia eta baita naturaz gozatzeko aukera aparta ere.

Adin honetako taldea honakoa da:

  • KOSTA ALA KOSTA (DBH 3-4 + BATXI) , 14-18 urte bitartekoak ( 2008, 2009, 2010 eta 2011 urteetan jaiotakoak) 350€ / 20 plaza

PREZIO GUZTIETAN APLIKAGARRIA:

  • AED-ko bazkide izateagatik %5 deskontua.
  • Familia ugaria %5 deskontua
  • Biak izanez gero %10 deskontua

Beraz, diru sarrera egitean, deskontuak kontuan izanik egin beharko da (ordainketa gaztearen izenean egin beharko da). Kasu hauetan agiriak aurkeztu beharko dira.

Izen emateak

Txatxilipurdiko udalekuetan izena emateko epea otsailaren 10ean irekiko da eta  apirilaren 23an bukatuko da. Aurrez-aurre zein on-line bidez jasoko dira izen emateak:

  • Txatxilipurdiren webgunean: www.txatxilipurdi.eus
  • Bulegoan: Nafarroa etorbidea 23, 1.solairua. Astelehenetik ostegunera, 9:30-13:30 / 15:00-17:00  Telf. 943795446