Ume eta nerabeek smartphonea erabiltzea atzeratzea helburu duen Gipuzkoako Altxa Burua mugimenduak, “Elkarrizketa gehiago. Jolas gehiago. Lasaitasun gehiago. Harreman gehiago. Osasun eta ongizate gehiago” kanpaina jarri du martxan. Honekin, jendea mugimenduarekin bat egitera animatu nahi dute.

Honakoa adierazi dute: “Zure helburuak badira, lehen smartphonearen eskuratzea atzeratzea; ikastetxeak smartphonik gabeko arnasgune bilakatzea; hezkuntzaren digitalizazio osasuntsu, libre eta ebidentzietan oinarritutakoa sustatzea; komunitatean, zentzuz eta eredu izanez heztea; eta ibilbide hau konpartitzen baduzu: hitzaldi eta tailerrak antolatzea; familientzat erremintak sortzea; komunitatea indartu eta saretzea; eta haurtzaro eta nerabezaroa osasuntsu eta libreago izatea, bat egin ezazu Altxa Burua mugimenduarekin!”. Horretarako, galdetegi labur hau bete daiteke.

Horrez gain, honako abantaila hauek azpimarratu dituzte: “Familiak elkartzen garenean presioa gutxitu egiten da. Gehiengoak bidea elkarrekin egiten badugu gauzak aldatzea posible da”.

20.000 familia baino gehiago

Gaur egun, Altxa Burua herritarren ekimenak, hiru lurraldeetako hogei mila familia baino gehiago biltzen ditu. 2021ean abiatu zuten proiektua, eta, ordutik, mugimendua ez da soilik parte hartzen duten familien kopuruan hazi. Gaur egun, ehun bat hezkuntza-zentro inguru batu dira ekimenera —euskara eskolak, eskola publikoak eta kristau eskolak esaterako–.