Hedatze berrikuntza-programaren baitan, ikasturte honetan, Eusko Jaurlaritzako Hezkuntza Sailak martxan jarri du ‘HE-Indartuz’. Neurri honen helburua, Lehen eta Bigarren Hezkuntzako ikasleen irakurketa eta matematika gaitasunak “indartzea” da, eskolaz kanpoko laguntza eskainiz. Hala, ikasleen arteko errendimendu desberdintasunak “murriztu” nahi ditu Jaurlaritzak: “Garapen pertsonal, sozial eta profesionalerako funtsezko oinarriak dira irakurketa eta matematika, eta, horregatik, arlo horiek indartzea beharrezkoa da kalitatezko hezkuntza bat bermatzen jarraitu ahal izateko. Modu berean, ezaguna da zenbait ikaslek zailtasun bereziak dituztela arlo horietan”, diote Hezkuntza Sailetik.

6-12 ordu astean

Programa hau, 2024-2028 Hezkuntza Emaitzak Hobetzeko Estrategiaren baitan kokatzen da, 7. jarduketan; zailtasun handienak dituzten ikasleei eskolaz kanpoko hezkuntza-laguntza eskaintzera bideratuta dagoen ataza hain zuzen. Neurri honetan parte hartuko duten ikastetxeak hautatzeko bi alor hartuko dira kontuan: Hedatze programakoa den eta neurria hedatzeko asmoa duen ikastetxeak.

Ordu-esleipenari dagokionez astean 6-12 ordukoa da ikastetxe bakoitzeko; DBHko talde kopuruaren arabera. Hori berrikuntza bat da Hedatze proiektuaren esparruan, izan ere, “berariaz aitortzen baitu denbora espezifiko bat dagoela errefortzu-saioetarako”, konpetentzien ikaskuntzan eragin zuzena duena. “Jarraibide horiek jarraibide komun batzuk ezartzen dituzte orduak modu eraginkorrean, irizpide
pedagogiko koherenteekin eta euskal hezkuntza-sistemaren ekitate, inklusio eta etengabeko
hobekuntza-printzipioekin bat etorriz erabiliko direla bermatzeko”, azaldu du Hezkuntza Sailak.