Eusko Jaurlaritzak eta Deustuko Unibertsitateak sustatuta, Adimen Gaitasun Handien garapena sustatu eskola inklusiboetan I. nazioarteko biltzarra egingo dute San Mamesen, maiatzaren 13an eta 14an. Bi egun horietan, goi-mailako gaitasunak dituzten ikasleak identifikatzeko, hezkuntzan esku hartzeko eta haiei laguntzeko estrategiak landuko dira. Horretarako, nazioarteko espezialisten, ikertzaileen, irakasleen, familien eta erakundeetako ordezkarien arteko, “elkartrukerako eta ikaskuntza partekaturako gunea” prestatuko dute.

Kongresuaren egitaraua

Berkeley Unibertsitateko Rena Dubotnik doktorearen partaidetzarekin inauguratuko da Bilboko kongresuaren lehenengo ekitaldia. Talentuaren garapenean, nazioarteko erreferentea da Dubotnik eta alor horretako erronka eta aukera nagusiak aztertuko ditu.

Kongresuaren baitan, bestalde, honako gai hauek ere landuko dira: goi-mailako gaitasuneko
ikasleen errendimendu baxua; hori prebenitzeko eta eskola-arrakasta bultzatzeko estrategiak –Connecticuteko Unibertsitateko Betsy McCoachen eskutik—, eta hezkuntza-erantzunaren bilakaera eta gainditu gabeko erronkak, Hezkuntza Sailaren eta Deustuko Unibertsitatearen ekarpenen bidez.

Hezkuntza praktikoan ere sakonduko dute: ikaskuntzaren pertsonalizazioan eta ikasleen potentzialaren garapenean oinarritutako sinposio bat egingo da, baita familia-inguruneak eta ingurune estrakurrikularrak haren akonpainamenduan duen zereginari buruzko mahai-inguru bat ere, elkarte eta proiektu espezializatuen esperientzia txertatuta.

Bigarren egunean berriz, nazioarteko ekarpena areagotuko da: bereziki ezohikoak diren ikasleak, hezkuntza-erantzunean adimen artifiziala erabiltzea eta garapen emozionala ongizaterako funtsezko elementu gisa jorratuko dira. Ikastetxeen esku hartzeko ereduak eta jardunbide egokiak ere aurkeztuko dira.

Eusko Jaurlaritzatik adierazi dutenez, helburua, “ezagutzak, esperientziak eta tresnak partekatzea da, talentua hainbat hezkuntza-testuingurutan ezagutu eta garatzeko, eta, hala, gero eta inklusiboagoa den eta ikasle guztien beharrei erantzuteko gai den hezkuntza-sistemarantz aurrera egiten laguntzea”.