Osakidetzak HaurSare jarri du abian, patologia kroniko konplexuak eta zainketa aringarrien beharra dituzten haur eta nerabeentzako arreta espezializatu eta koordinatuko sare berria eta modu progresiboan ezarriko dela azaldu dute arduradunek.

Osakidetzatik emandako datuen arabera pediatriako haur eta nerabeen % 6,8k dute patologia kroniko konplexua, eta 10.000 adingabetik 90 batek zainketa aringarriak behar dituzte. Paziente horiek et haien familiek laguntza jarraitua, erantzun azkarrak, profesionalen arteko benetako koordinazioa eta egoera bakoitzera egokitutako hurbileko arreta gizatiarra behar dute.

Lan-sare partekatua

HaurSare lan-sare partekatuan oinarritzen da eta asistentzia-continuumean. Asteko zazpi egunetan eta 24 orduz emango du arreta eta sareak diziplina anitzeko ospitale-taldeak izango ditu erreferentziazko lau antolakunde sanitario integratuetan: Gurutzetako Unibertsitate Ospitalean, Basurtuko Unibertsitate Ospitalean, Donostiako Unibertsitate Ospitalean eta Arabako Unibertsitate Ospitalean.

Sareak laguntza emozionalerako arreta psikologikoa eta dolurako babesa ere aurreikusten dituela azaldu dute Osakidetzatik. Bizkaian eta Gipuzkoan lurraldeko psikologo bat izatea aurreikusten da, eta Araban arreta partekatua aurreikusten da helduen zainketa aringarrien unitatearekin.

Funtsezko figura erizaina izango da. Osakidetzak osasun-eremu integratuetan banatutako hamasei erizainez osatutako sarea aurreikusi du.

Ekipoen lurralde-banaketa

Gurutzetako Unibertsitate Ospitalea

Gurutzetako Unibertsitate Ospitalea Bizkairako erreferentziazko zentroa izango da, eta lurraldeko ESIei eta eremu osoko etxez etxeko ospitalizazio pediatrikoari sostengua emango die. Proposamenak aintzat hartzen du bertako lan-taldea indartzea pediatra, erizain espezialista eta administrari gehiagorekin eta Bizkairako gizarte-laneko eta psikologiako estaldura partekatuarekin, Basurturekin batera.

Basurtuko Unibertsitate Ospitalea

Basurtun, kanpo-kontsultetako egungo diziplina anitzeko kontsultak patologia kroniko konplexuak eta zainketa aringarrien beharra dituzten haur eta nerabeak artatzen ditu. Proposamenak aurreikusten du lan-taldea indartzea pediatra, erizain eta administrari gehiagorekin eta Bizkaia osorako gizarte-laneko eta psikologiako baliabide partekatu gehiagorekin.

Donostiako Unibertsitate Ospitalea

Donostian, diziplina anitzeko kontsultak patologia konplexuak eta zainketa aringarrien beharra dituzten adingabeei eskaintzen die arreta, eta lan-taldea handitzeari esker, ahalmen handiagoa izango da etxez etxeko arreta eskaintzeko eta lehen mailako arretako taldeei laguntzeko. Proposamenak pediatria, erizaintza, gizarte-lana, psikologia eta administrazio-laguntza indartzea barne hartzen du.

Arabako Unibertsitate Ospitalea

Araban, helduen zainketa aringarrietako eta lehen mailako arretako taldeen laguntzarekin egin da etxez etxeko arreta. Antolaketa berriak aurreikusten du lurraldea lan-talde minimo propio batez hornitzea. Lan-talde horrek pediatrak, erizainak, administrazio-laguntza, psikologoak eta gizarte-laneko profesionalak izango ditu —helduen dispositiboarekin koordinatuta—.