Eusko Jaurlaritzak Adi! Filmak euskaraz izeneko egitasmoa jarri du martxan, Ikus-entzunezkoen arloan euskararen erabilera eta eskaintza indartzeko asmoz. Ekimenak, bereziki, aisialdiko kontsumo handiko eremu batean eragin nahi du: zineman eta eduki digitalen plataformetan.

Maracuda filmaren euskarazko estreinaldia aitzaki hartuta, Bilboko Azkuna Zentroan egin dute ekimenaren aurkezpena. Ekitaldi horretan 400 ikasle eta familia inguru izan dira, baita Ibone Bengoetxea lehendakariorde eta Kultura eta Hizkuntza Politikako sailburu Ibone Bengoetxea, eta EZAEko presidente Alfonso Benegas. Nabarmendu dutenez, helburua da “euskara eguneroko aisialdian ere modu naturalean txertatzea, bereziki gazteen eta familien artean”. Horretarako, zinema-aretoetan euskarazko filmen eskaintza handituko da, urtean 24 estreinaldi eskainiz; horietatik erdiak nazioarteko ekoizpen handiak izango dira.

Programazioak animaziozko filmak, familiari zuzendutako zinema eta nazioarteko frankiziak bilduko ditu, publiko zabalago batengana iristeko asmoz. Horrela, ikusleek ohiko estreinaldi komertzialak euskaraz ikusteko aukera handiagoa izango dute.

Plataforma digitalak

Bestalde, egitasmoak plataforma digitalen eremuan ere eragin nahi du. Netflix, Amazon Prime Video eta Movistar Plus+ bezalako zerbitzuetan, baita EITB-ren edukietan ere. Adierazi dutenez, lehen estimazioen arabera, “zenbait plataformetan dagoeneko 1.000 titulu inguru daude eskuragarri” euskaraz.

Informazio hori guztia herritarren eskura jartzeko, gune berezi bat prestatu dute Kulturklik plataforman. Bertan kontsultatu ahal izango da zer eduki dauden euskaraz, non ikus daitezkeen eta noiz egongo diren ikusgai.