Sekulako tabua izaten jarraitzen du amon sexualitateak, eta zalantzarik balego, bai, amok ere sexu desira izan dezakegu eta baita sexu praktikak izan ere. Ama taldeetan oso ohikoak dira sexualitatearen inguruko zalantzak, esperientziak partekatu beharra eta begirada konplizeak.


Haurdun dagoen emakumearen irudia asexual eta ama birjinaren balioekin lotzen da sozialki maiz; eta, akaso, aurrean duzun ama horrek eliza bakarti batean ama birjinaren irudia begira duela larrua jotzeko desira sutsua du… Emakume haurdun askok adierazi ohi dute, erdi lotsaz maiz, haurdunaldiko sexuak plazer areagotua sortu izana. Bigarren hiruhilekoa izan ohi da fisikoki hobea emakume askorentzat eta sentikortasun areagotua izanik genitaletan, bularrean zein emozioetan ere, plazer handiko garaia izan daiteke. Beste batzuentzat, aldiz, desira erabat itzaltzen diren hilabeteak izan daitezke.

Aurrekontzeptzioaren edo ama izateko prozesuan bertan ere mota guztietako esperientziak agertzen dira. Presiorik gabe gozatzea helburu izan dezaketen bikote heterosexualak, tratamendu gogorrak bizi dituztenak, denbora luzez sexu harremanak egutegiaren arabera bideratzen dituztenak, adopzio edo harrera prozesuetan daudenak… Beraz amatasunera heltzeko bidetik bertatik ere desberdintasun handiak izan daitezke sexualitateari dagokionean.

Gutxi aipatzen da sexu praktikek eta, batez ere, orgasmoak erditze prozesuan izan ditzaketen onurez. Batetik, sortzen diren hormonek plazera eta segurtasuna sortzen dutelako eta erditzeak horixe behar duelako. Bestetik, semenak erditzeko dilatazioan eta eragitean lagun dezakelako. Erditzean bertan ere, hau da, uzkurdurak hasita daudenean ere, masturbazioak edo bestelako sexu praktikek onurak dauzka emakumeak hala nahi duenean. Tamalez, gaur egungo erditzeen artatzean eta sozialki dugun iruditerian hau pentsaezina bihurtzen da maiz. (Bultzadatxo gisa balio badizu, nire orgasmorik onenak, zalantzarik gabe, azken erditzean izan nituen…).

Ondoren dator maiz sexu harremanei dagokionean aldaketarik sakonena: erdiondoan edo haurra etxera heltzen den unean. Fisikoki garai konplexua da erdiberria den emakumearentzat eta maiz, hormonen dantza handiaz gain, orbanak, mugikortasun arazoak, mina… batzen dira. Sexu desira kolpetik galtzen dutela adierazi ohi dute emakume batzuek eta beste batzuek, aldiz, hormona zurrunbilo horretan beroaldi handiak eta desira eza bizi dutela aldi berean. Garai honetan, gainera, handicap bihurtzen da une egokia topatzea ere: 24 orduz behar gaituen haur batekin erotismorako tarteak murritzak izan daitezke eta lo dagoenean lo egitea, jatea, dutxatzea edo komunera joateko beharra sexu grinarekin balantzan jarri behar dira.

Haurrak hazi egiten dira, baina… eta horrekin, gutxinaka denboraren birkonkista heltzen da eta desira berriro ager daiteke. Gorputz berriarekin birkonektatzea, plazererako bide berriak edo norbera ezagutzeko garaia izan ohi da. Masturbazioa da amen taldeetan erotikaz aritzen garenean gehien agertzen den praktika. Errazagoa da norbere buruarekin tartetxoa topatzea bikotekidea dutenek elkar topatzea baino maiz…

Ohiko bihurtu da ere azken pare bat urteetan ama taldeetan banatu diren amen esperientzien partekatze askea: polimaitasuna eta Tinder hitzak bogan daude. Hau da, ez da soilik amek larrua jotzen dugula, amek ligatzen dugula ere ez dugu ahaztu behar.

Sexu bidezko transmisioko gaitzen gorakada ematen ari da amen artean eta nahi gabeko haurdunaldiak eta haurdunaldiaren borondatezko eteteak ere gorakadan somatzen dira.

Sexu transmisio bidezko gaitzei dagokioenez, haurdunaldian sentikortasun areagotuaz gain permeabilitatea handiagoa denez, kutsatzeko arriskua handiagoa da eta gaitzik ez duela ziurtaturik ez badago, babes neurri fisikoak -preserbatikoa edo latex hesia gisa- erabiltzea gomendatzen da. Gaitz horietako batzuk haurrarentzat arriskutsuak izan daitezke karenaren hesia gaindituta, erditze kanalean kutsatuta edo edoskitzaroan ere. Haurdunaldiz kanpo ere, kutsatzeak gerta daitezke. GIB infekzio berrien adin ohikoena 30-39 urteen artean kokatzen da gaur egun. Gorakada kezkagarrian daude sexu transmisio bidezko gaitzak azken urteetan.

Bilatu gabeko haurdunaldiei dagokionez, 2024. urteko EAEko datuei erreparatuz gero, egin ziren borondatezko abortuen ia erdia gutxienez aurrez bizirik dagoen seme-alaba bat zuten emakumeek izan zituzten. Bataz besteko abortatzeko adina 28,63 urtekoa izan zen eta 1890 emakumek 30 urtetik gora zituen haurdunaldia eten zuenean.

Garrantzitsua da hortaz, amen sexualitateaz hitz egiten dugunean oinarrizko prebentzio neurriak hartzea eta gaztetxoekin egiten diren hezkuntza programak zabaltzea emaginaren edo ginekologoen kontsulten bidez eta bestelako bideetatik.

Tabuak hausten hasita eta polimaitasuna edo Tinderren hari muturrari berriro helduz, ama askok adierazten dute kezka ama identitateari dagokionean. Azalduko dut ama naizela, noiz, nola… arriskuan jar dezaket haurra ama naizela nire profilean jarrita? Arazorik izango dut haurraren aitarekin Tinderren nagoela baldin badaki?

Beraz bai, amek ere badugu desira sexuala…