Eusko Jaurlaritzak seme-alabak dituzten familientzako dirulaguntzak aldatzea erabaki du, eta berrikuntza nagusia izango da gaur egun 3 urtera arte ematen den hilean 200 euroko laguntza urtebete gehiago luzatzea. Horrela, haurrak 4 urte bete arte jaso ahal izango dute familiek dirulaguntza hori.

Neurriak, 2026ko urtarrilaren 1era arteko atzeraeragina izango du. Hala ere, laguntzak eskatzeko aukera dekretua EHAAn argitaratzen denean zabalduko da, aurreikuspenen arabera ekainaren amaieran.

Norentzat izango da?

Laguntzak eskatu ahal izango dituzte EAEn bizi eta erroldatuta dauden familiek, baldin eta adingabearekin batera bizi badira eta haren zaintza bermatuta badute. Oro har, erroldan gutxienez urtebeteko antzinatasuna eskatuko da, edo azken hamar urteetan bost urtez EAEn erroldatuta egon izana.

Zer aldatuko da?

  • Seme-alabak 4 urte bete arte jasoko dira 200 euroko dirulaguntzak. Orain arte, laguntza 3 urtera arte ematen zen.
  • Familia ugariek eta guraso bakarreko familiek, 100 euroko dirulaguntzak jaso ahal izango dituzte 4 eta 7 urte arteko seme-alabengatik.
  • Lehen aldiz, harrera-familiek eta tutoretza-familiek ere laguntza horiek jasotzeko aukera izango dute.
  • Errentaren araberako laguntzak kalkulatzeko, administrazioak azken zerga-ekitaldi likidatua hartuko du erreferentzia gisa.

Atzeraeragina izango du

Neurria 2026ko urtarrilaren 1era arteko atzeraeragina du, nahiz eta eskaera geroago egin. Horrek esan nahi du, familia batzuek urte hasierako laguntza jasotzeko eskubidea izango dutela, honako kasuetan:

  • Haurrak 3 urte 2025eko abuztuan bete bazituen, familiak 2026ko urtarriletik uztailera arteko laguntza jaso ahal izango du.
  • Haurrak 3 urte 2026ko urtarrilean bete baditu, laguntza 2027ko abendura arte jasoko du familiak.
  • Aldiz, haurrak 4 urte 2026ko urtarrilean bete baditu, ez du laguntza berri hori jasotzeko eskubiderik izango.
  • 4 urte 2026ko otsailean betetzen dituzten haurren familiek, berriz, urtarrileko ordainketa jasoko dute.

Noiz eskatu ahal izango da?

Laguntza berriak dekretua EHAAn argitaratu ondoren eskatu ahal izango dira. Jaurlaritzaren aurreikuspenen arabera, izapideak ekainaren amaieran zabalduko dira.

Datozen lau urteetan neurri horiek finantzatzeko 85,8 milioi euro bideratuko dira, eta aurten 33,8 milioi euroko partida izango dute laguntzek.