Txatxilipurdi elkarteak prest dauka aurtengo Eguzkilaru eta Gaztelaru eguna. Ekainaren 25ean haurrek eta nerabeek hartuko dute protagonismo osoa, eta egun osoko egitarau zabala antolatu dute haientzat Arrasateko hainbat gunetan.

Antolatzaileek azaldu dutenez, helburua haur eta nerabeak jaiaren erdigunean jartzea da. Horretarako, Eguzkilaruren barruan haurrentzako bi espazio bereizi antolatuko dituzte: Monterron parkea abentura gune bihurtuko da, eta Biteri plaza jolas gune. Nerabeek, berriz, Gaztelaru izeneko gune eta jai propioa izango dute Zaldibar parkean.

Monterronen kokatuko den abentura guneak 11:00etatik 13:30era bitartean hainbat ekintza eskainiko ditu, besteak beste tirolina, kutxa dorrea, 0-4 urte bitartekoentzako gunea, ur bideak, zuhaitz margolariak eta jolas erraldoiak. Eguerdiko 12:00etan ipuin kontaketa egingo dute, eta arratsaldeko 19:00etan Porrotx, Marimotots, Pupu eta Lore pailazoek Zerua lapurtu dute ikuskizuna eskainiko dute.

Biteri plazan, berriz, jolas gunea izango da protagonista. 11:00etatik 13:30era aurpegi margoketa, ohe elastikoak, arte txokoa eta kartoiarekin sortzeko tailerra izango dira, guztiak musikaz girotuta. Eguerdiko 13:00etan Eguzkilaruren ongietorria eta makalaren igoera egingo dituzte, eta ondoren, 13:30ean, apar festa izango da. Eguraldi txarra eginez gero, jarduerak Uarkape pilotalekuan egingo dituzte.

Gaztelaru egitasmoak nerabeei zuzendutako egitaraua eskainiko du Zaldibar parkean, 11:30etik 18:00etara. Jardunaldia gazte kedadarekin hasiko da, eta ondoren bazkaria prestatzeko tartea eta musikaz girotutako txokoak izango dira. 14:30ean bazkaria egingo dute, eta arratsaldean jolasak, Sorginak gazte taldearen kontzertua eta pintxada kolektiboa izango dira.

Horrela, Txatxilipurdik haur eta nerabeentzako festa egun berezia prestatu du beste urte batez, aisialdia, sormena, jolasa eta elkarbizitza uztartuko dituen egitarau zabalarekin.