Ikasturte berria hasteak ahalegin ekonomiko eta logistiko handia eskatzen die familiei. Hirukideren (familia ugarien elkartea) arabera, seme-alaba bakoitzeko gastua 500 euro ingurukoa da aurten, eta %12 igo da. Elkarteak laguntza gehiago eskatu ditu eta eskolako materialaren benetako beharrak berrikustea proposatu du.

Iraila iristearekin batera, familieon egutegia goitik behera aldatzen da: eskola, jangela, garraioa, eskolaz kanpoko jarduerak eta laneko ordutegiak berriro uztartu behar dira. Horri gastu ekonomikoa gehitzen zaio, eta familia askorentzat baita familia ugarientzat ere egoera bereziki zaila bihurtzen ari da.

Hirukideko zuzendari Natalia Díez-Caballerrek egoera modu argian laburbildu du Ser katean egin dioten elkarrizketa batean: «Ikasturte hasiera familia ugarientzako bigarren urtarrileko aldapa bihurtu da».

Liburuak eta eskolarako materiala, gastuaren zati bat baino ez

Familiek ez dituzte soilik liburuak eta eskola-materiala ordaindu behar. Arropa, jangela, garraioa eta eskolaz kanpoko jarduerak ere kontuan hartu behar dira, eta seme-alaba bat baino gehiago duten etxeetan gastuak biderkatu egiten dira.

“Hirukidek emandako datuen arabera, familien %35ek aisialdiari, bidaiei edo bestelako gastuei uko egin behar diete ikasturte hasierako gastuei aurre egiteko.”

Horregatik, federazioak liburu eta eskola materiala kudeatzeko egungo programa zabaltzea proposatu du. Gaur egun DBHko bigarren mailara iristen den programa DBH4ra arte luzatzea nahi dute, eta ikastetxe publikoetara ez ezik itunpekoetara ere zabaltzea.

«Batzuetan erosten den materiala gero ia ez da erabiltzen»

Hirukidek ikastetxeei ere eskatu die familiei eskatzen zaien materiala berrikusteko, Díez-Caballerren arabera, «batzuetan liburuak erosten dira eta ikasturtean zehar ia ez dira erabiltzen». Horrelako egoerek familientzako alferrikako gastuak sortzen dituztela ohartarazi du.

Liburuen prezioa ere ez da txikia: ale batzuek 30 eta 50 euro artean balio dezakete, eta zenbait kasutan formatu fisikoari lizentzia digitalaren kostua gehitu behar zaio.

Eskolaz kanpoko jarduerak

Ekonomia estutzen denean, (edo berez estua denean) eskolaz kanpoko jarduerak izaten dira familiek lehenik zalantzan jartzen dituzten gastuetako batzuk.

Kirola, hizkuntzak edo kultur jarduerak ez dira merkeak, eta kirol batean federatzearen kostuak eta kirol-materialak ere gehitu daitezke. Baina jarduera horiek badute aitortzea merezi duen beste funtzio bat ere: familien kontziliazioa erraztea.

Kontziliazioa, iraileko beste erronka handia

Ikasturte hasierak ez du soilik familiaren aurrekontua baldintzatzen. Ordutegi berriak antolatzea ere erronka izaten da.

Hirukiderek eamandako datuen erabera, familien %63k lanerako ordutegi malgutasuna jotzen du kontziliaziorako neurri garrantzitsuenetako bat.

Díez-Caballerrek aitortu du azken urteotan aurrerapausoak eman direla lan-eskubideetan eta laguntza ekonomikoetan, baina oraindik ere sektore eta lan-hitzarmen batzuetan zailtasunak daudela.

Irailean errutinak berreskuratzea ere bai

Ikasturte berriaren hasiera ez da gastuez soilik hitz egiteko unea. Familien eguneroko errutinak berrantolatzeko garaia ere bada.

Hirukidek bereziki azpimarratu du pantailen erabilera berriro mugatzeko eta etxeko deskonexio digitaleko ohiturak berreskuratzeko beharra.

Díez-Caballerrek positibotzat jo du gero eta ikastetxe gehiagok telefono mugikorren erabilera mugatzen edo debekatzen duten neurriak hartzea. Bere ustez, horrelako neurriak lagungarriak dira haurrek eta nerabeek sozializatzeko eta pantailatik deskonektatzeko denbora gehiago izan dezaten.

Azken batean, iraileko erronka ez da soilik motxila prestatzea. Familien ekonomia, lan-ordutegiak, haurren aisialdia eta etxeko errutinak berriro uztartzea ere bada. Eta, Hirukideren esanetan, horretarako familien beharrei begiratuko dieten politika eta laguntza gehiago behar dira.