Iraila da urtero Haur Minbiziaren Sentsibilizazio Hilabetea, eta aurten Aspanogik hizkuntzan jarri du arreta. Hitzek ez dute diagnostikoa aldatzen, baina lagundu egin dezakete lelopean, elkarteak gogoeta egiteko eskatu du: “nola hitz egiten dugun minbizia duten haur eta nerabeei buruz, zer mezu helarazten dugun eta hitz horiek nola eragin dezaketen gaixotasun-prozesu bat bizi dutenengan”. Kanpainaren berri Gipuzkoako Foru Aldundian egindako agerraldian eman dute.

Hizkuntza ere laguntzaren parte

Aspanogiren arabera, minbizia duten haur eta nerabeak ezin dira diagnostiko batera mugatu. Pertsona bakoitzak bere beldurrak, nahiak eta gaixotasuna bizitzeko modu propioa ditu. Horregatik, elkarteak ez du hitz “debekatuen” zerrendarik proposatu nahi; aitzitik, egunerokoan automatikoki erabiltzen diren adierazpideez jabetzea eta, beharrezkoa denean, horiek berrikustea nahi du.

Hitzek gertutasuna eta babesa adieraz ditzakete, baina presioa edo distantzia ere eragin dezakete. Horregatik, ASPANOGIk familiei, komunikabideei, erakundeei, hezkuntza-komunitateari eta herritarrei dei egin die komunikatzeko modua zaintzera. Azken batean, elkartearen mezua da entzutea, galdetzea eta pertsona bakoitzaren erritmoa errespetatzea ere laguntzeko modu bat direla.

Urrezko begiztak eta haurrentzako jarduerak

Sentsibilizazio-hilabete honetan, urrezko begiztak izango du protagonismoa Gipuzkoan. Haur eta nerabeen minbiziaren nazioarteko ikurra da, eta hainbat udalek Aspanogiren pankartak jarriko dituzte beren eraikin eta gune esanguratsuetan. Dagoeneko baieztatuta daude Gipuzkoako Foru Aldundiaren Jauregia eta Donostiako Udala, eta gainerako udalerrien parte-hartzea baieztatu ahala jakinaraziko du elkarteak.

Horrez gain, Aspanogik hainbat jarduera antolatuko ditu irailean txikienentzat, topaketa, aisialdia eta parte-hartzea sustatzeko. Data eta leku zehatzak bere komunikazio-kanalen bidez jakinaraziko ditu.

Azkenik, Aspanogik gogorarazi nahi du haur eta nerabeen minbiziak familia osoaren egunerokoan duela eragina, eta sentsibilizazioa ez dela irailean bakarrik egin beharreko lana. Elkarteak adierazi du, urte osoan jarraitzen duela familien ondoan, diagnostikotik hasi eta tratamendura, jarraipenera eta ondorengo etapetara arte.