Gaurkoan, serie berri bati ekingo diogu. Euskal literaturan gurasotasuna modu batera edo bestera lantzen duten liburuak aipatuko ditugu; izan ere, literatura ere herri baten izatea islatzeko eta hausnarketarako lagungarri izan daitekeela uste dugu.

Liburu nahiko berri batekin hasiko dugu sorta hau. Maddi Ane Txoperenaren Zaldi bat liburuak gai asko lantzen ditu, eta agian gurasotasuna edo amatasuna ez da gai nagusia, baina istorioan oso presente dagoela esan dezakegu.

«Alaba jaio eta sei hilabetera, mendira joaten hasiko da Miren, Unai hil eta bortz urtera. Zaldi bat aurkituko du han: grisa, marroia baino gehiago. Ez edozein zaldi.»

Amatasunarekin batera sortzen diren beharrak nabarmentzen dira liburuan. Ama izan diren askok beren burua identifikatuta sentituko dute; beste askok, agian, ez. Gurasotasuna eta ondoren sortzen den bikote-harremana ere ageri dira, baita harreman horrek dituen ertz eta ñabardura ezberdinak ere.

Zaldi bat liburuan, heriotza, dolua, maitasuna, espiritualtasuna, eromena eta amatasuna korapilatuko dira, laguntasunaren inguruan.

Maddi Ane Txoperena | Argazkia: Irantzu Pastor. Pikaratik ekarria