Formakuntza saioak izango dira urriaren 13an eta 21ean, 18:30ean, sarean eta doan. Josu Ozaita antropologoa, Jon Mentxakatorre filosofia eta euskal filologian doktorea izango dira formatzaileak. Haiekin batera izango da Nekane Martiarena eta Dani Beaumont herrietako esperientziak ekartzeko.

Saioen izenburua da Itzalitako kalabazak piztera goaz eta zabalik da izen-ematea hemen. Saioen antolaketa honakoa izango da:

—Urriak 13, asteartea: Gau Beltza: hurbilpen eguneratu bat. Nondik dator? Zer da? Josu Ozaita eta Dani Beaumonten eskutik.

—Urriak 21, asteazkena: Errito eta mitoak: Komunitatea trinkotzeko ezinbesteko osagaiak. Jon Mentxakatorre eta Nekane Martiarenaren eskutik.

Badira urte batzuk Gau Beltzaren bueltako ohitura zaharrak berreskuratzeko mugimendua sortu zela Euskal Herrian. Kalabazak hustu, kandelak piztu… jaia berrasmatzen ari dira herriz herri.

Itzalitako Kalabazen Berpiztea (Altuna & Ozaita, 2018) lan etnografikoa oinarri hartuta, dagoeneko erritual hauen berreskurapen edo berrasmatzean hasiak diren herrietako esperientziak jaso ditu Taupak. “Antolatzaile zein hartzaile izan direnekin bildu, ikuspegi ezberdinetako ekarpen berriak jaso, eta guztien artean adostutako oinarri partekatu batekin osatu dugu eskuartean duzuen tresna proposamena: Gau Beltza antolatzeko baliabide kutxa. “Tresna eta gonbidapena da aldi berean: bakoitzaren errealitatetik abiatuz, oinarri partekatua izango duten Gau Beltzak herriz herri antolatzeko gonbidapena. Kutxa zabaldu, irakurri, ukitu, ordenatu, baztertu, gehitu…”.

Gau Beltzaren inguruko informazioa Gaubeltza webgunean dago eskuragarri, beste hainbat euskarri eta materialekin batera.