Abenduaren 4tik 8ra egingo dute Durangoko Azokaren 61. edizioa eta antolatzaileek, Ikastolen Elkartearekin elkarlanean, 12 eta 17 urte bitarteko gazteei zuzendutako BADA! unitate didaktikoa prestatu dute, ikastetxeetan euskal kulturan murgiltzeko eta Durangoko Azoka sakonago ezagutzeko.

Proposamena baliatuz, ikasleek Durangoko Azoka sakonago ezagutzeko eta euskal kulturan murgiltzeko aukera izango dute, jolasaren eta hausnarketaren bidez eta euren herriko edo inguruko
testuingurutik abiatuta.

Hiru faseko ibilbidea

Unitate didaktikoak hiru fasetan antolatutako ibilbidea proposatzen du eta guztira
hamar jarduera jasotzen ditu. “Ez da beharrezkoa jarduera guztiak egitea: irakasleek eta
ikasleek euren testuinguruaren eta interesen arabera diseinatu ahal izango dute ibilbidea,
proposatutako jardueren artean hausnarketak eginez”, azaldu dute.

Lehen fasea, Girotzen eta berotzen izenekoa, Durangoko Azoka hasi aurretik egingo
da, eta azokaren unibertsoan murgiltzea eta ikasleen aurretiazko ezagutzak eta motibazioa
piztea du helburu. Besteak beste, ikasleen kultur zaletasunak aztertzeko, Durangoko Azoka
ezagutzeko eta euskal kulturan erreferente diren sortzaileak ikertzeko jarduerak proposatzen
dira.

Bigarren faseak, Plazara! izenekoak, ekintzara igarotzeko proposamena egiten du,
ikasleak Durangoko Azokara bertaratu edo ikastetxean bertan azokako giroa birsortuta. Hiru
jarduera jasotzen ditu: Durangoko Azokaren Kultur Alfabetoa (DAKA), testu eta
sormen-lanen inguruko jolas literarioak eta kultur ekoizpenen arteko loturak aurkitzea.
“Horien artean bi erronka egongo dira: batetik, PortaDA!, disko eta liburu azalekin argazkiak
sortzeko; eta, bestetik, mikro-kontakizunak idazteko erronka”, azaldu dute.

Azkenik, Mamiari tiraka faseak azokaren ondoren emango dio jarraipena
ikaste-esperientziari. Bi jarduera proposatzen dira, bizitakoaren inguruko sorkuntza eta
hausnarketa partekatua lantzeko. Horien artean, ikastetxean euskal kulturaren erreferente
aktibo bihurtzeko eta ikasle eta irakasleen arteko hausnarketa kritikoa sustatzeko jarduerak
daude.

Euskal kulturarekiko atxikimendua lantzen

Proposamen didaktikoak euskararen eta euskal kulturaren arteko lotura kontzientea
lantzea du helburu eta kulturaren ezagutza eta sentsibilizazioa sustatu nahi ditu ikasleen
artean.

Horretarako, jolasak, talde-lanak eta hausnarketak hartzen ditu oinarri, eta kulturaren
lanketa ez du Euskara eta Literatura arlora mugatzen: curriculuma osatzen duten hainbat
jakintza-arlotara zabaltzeko proposamena da.

“Unitateak, gainera, Durangoko Azokan parte hartzen duten kultur eragileak eta haien
lanak ezagutzeko aukera ematen du, baita ikasleen inguruan euskal kulturgintzan
diharduten sortzaile eta taldeak ezagutzeko ere. Horrela, azoka abiapuntu hartuta, ikasleek
kulturaren inguruko hausnarketa egitea eta eurek ere kulturari egin diezaioketen ekarpena
proposatzea bilatzen da”, azaldu dute bultzatzaileek.

Durangoko Azokaren eta Ikastolen Elkartearen arteko elkarlanaren emaitza den
proposamen didaktikoa Euskal Herriko hezkuntza-komunitatearen eskura jarri da, ikastetxe
bakoitzak bere behar eta interesen arabera egokitu dezan.