Elhuyarrek sei hitz-jolas jarri ditu martxan, euskararen hiztegia modu ludiko eta entretenigarrian lantzeko. Elhuyar Hiztegiaren webgunean eta mugikorretarako aplikazioan daude eskuragarri: Hitz-katea, Anagrama, Urkatua, Hitzak konektatu, Asmatu hitza eta Hitza ezabatu. Jolasen hauen bidez, erabiltzaileek hiztegia osatu eta hitzen inguruko informazio gehiago eskuratzeko aukera izango dute.

Modu librean edo lehiaketa-moduan jolastu ahal izango da, eta zenbait jokotan zailtasun-maila ere aukeratu ahal izango da. Gainera, izena ematen dutenek sailkapenean parte hartu eta beste jokalariekin lehiatzeko aukera izango dute. Gaurko jolasa atalean, berriz, egunero sei jolasetako bat proposatuko dute, parte-hartzaile guztiek baldintza beretan joka dezaten. Ekimena ikasle, irakasle eta profesionalei, euskara ikasten ari direnei eta hitzekin jolastea gustuko duten guztiei zuzenduta dago.