Bizipoza elkartearen 10. jardunaldiak izango dira eta helburua izango da aztertzea nola koka daitezkeen haurren eskubideak erdigunean eta horiek errealitate bihurtu.

Usurbilgo Sutegi aretoan egingo dute lehen saioa azaroaren 21ean, eta bigarrena Bilboko La Bolsa eraikinean azaroaren 28an, biak 09:30etik 13:30era. Nola kokatu haurren eskubideak erdigunean? Eta errealitate bihurtu? izenburupean egingo dira eta hemen eman daiteke izena.

Bizipozako langile Garazi Oregik, Usurbilgo alkate Agurtzane Solaberrietak, Pausoka elkarteko Amaia Irazustak eta gizarte-zerbitzuetako aditu Felix Arrietak aurkeztu dituzte jardunaldiak.

Bi jardunaldi, helburu bera

Usurbilgo jardunaldian Felix Arrietak, hezkuntza historian aditua den Peio Manterolak, Nagore Garcia de Andoin haur-onkologoak, Zelai Nikolas legelariak hartu dute parte lehen zatian. Elkarteen esperientziekin jarraituko du saioak, eta Ndank Ndank, Pausoka, Hil Argi, Ume Alaia, eta Aspanogi elkarteetako ordezkariek hartuko dute hitza.

Bilboko jardunaldian Felix Arrieta, Peio Manterola eta Zelai Nikolas izango dira hizlari berriro, eta baita ere Nerea Godoy hezitzailea. Bigarren zatian Kale Dor Kayiko, Gure Señeak, Esku Hutsik, Naizen, eta Aspanovas elkarteek hartuko dute hitza.

Bi topaketetan, haurren eskubideen inguruko kontzeptualizazioa, hausnarketa eta elkarteen esperientziak uztartuko dira, eskubideak bermatzeko dauden erronkak identifikatu eta aurrera egiteko proposamenak partekatzeko.

Oinarrizko eskubideen inguruko lanketa

Bizipozak urtarrilean abiatu zuen haurren oinarrizko eskubideen inguruko lanketa. Prozesu horren helburua da haur guztien eskubideak bermatzeko dauden hutsuneak identifikatzea eta horiei erantzuteko proposamenak lantzea.

“Haurren eskubideak bermatzea funtsezkoa da haur guztiek beren bizitza-planak garatzeko aukera izan dezaten. Eskubide horiek ez dira legeetan aitortuta egotearekin bakarrik bermatzen; eguneroko bizitzan ere gauzatu behar dira, haur guztiek beren beharrak asetzeko, bizi-proiektuak garatzeko eta gizartean parte hartzeko aukera izan dezaten”, azaldu dute. “Hori lortzeko, ezinbestekoa da elkarteek, familiek, hezkuntza-komunitateak eta instituzioek elkarlanean jardutea. Bizipozako elkarteek beren eguneroko esperientziatik ezagutzen dituzte haurrek eta familiek aurkitzen dituzten zailtasun asko. Jardunaldien bidez, esperientzia horiek partekatu, egoera desberdinak aztertu eta haurren eskubideak errealitate bihurtzeko tresnak eta proposamenak lantzea da helburua”.