Etxebarriko XI. Zientzia Astea bihar, azaroak 13 amaituko da, eta haur zein familientzako tailer eta antolatu dituzte azken egun honetarako. Ekimena azaroaren 9an hasi zen, Zientzia xede bila lelopean, kultura zientifikoa herritar guztiei hurbiltzeko eta zientzia egunerokokotasunean bizirik dagoela erakusteko helburuarekin. Aurtengo egitaraua prestatzeko orduan, gainera, herritarren parte-hartzea izan dute; uztailetik hona, intereseko gaiak proposatu eta bozkatzeko aukera izan dute, eta 64 erantzun jaso dituzte guztira.

Bihar, 17:00etatik aurrera, hainbat tailer egingo dituzte CIMEren eta udal frontoiaren artean. Besteak beste, DNA erauzteko esperimentua, indar hidraulikoari buruzko jarduera, izarren behaketa eta konpostaje-prozesua ezagutzeko tailerrak izango dira. Sateliteak klima-aldaketa aztertzeko nola erabiltzen diren ere landuko dute, baita etxeko ura arazteko iragazkiak egiten eta taumatropoen bidez zinemaren magia ezagutzen ere. Horrez gain, 7 eta 12 urte bitarteko umeei zuzendutako LED argien jarduera egingo dute 17:30etik 20:00etara, Udaletxeko plazan; parte-hartze libreko saioa izango da. Egunari amaiera emateko, 20:00etan txalaparta saioa egingo dute udal frontoian.

Bestalde, Bi ilunabarreko eguna erakusketa ikusgai egongo da, eta azaroaren 22ra arte bisitatu ahalko da Udaletxeko plazan. Erakusketa bidez, abuztuaren 12an bizitako eklipsean sakontzeko aukera izango dute herritarrek.

Izen-emateak zabalik

Tailerrak doakoak iren arren, gehienetan parte hartzeko aurrez izena eman behar da eta www.cimenet.net webgunean egin daiteke hori. Plazak mugatuak dira eta izen-emate ordenaren arabera esleituko dituzte. Izena emateko epea bihar arte dago zabalik.

Ostiraleko egitaraua

  • – 17:00-19:00 | CIME: Pentsamendu konputazionala. 7-12 urteko umeentzat. Bi saio: 17:00-18:00 eta 18:00-19:00.
  • – 17:00-17:50 eta 18:00-18:50 | Udal frontoia: Bizitzaren kodea: DNA erauztea. 10-12 urteko umeentzat. Bi saio.
  • – 17:00-17:50 eta 18:00-18:50 | Udal frontoia: Energia garbiak: indar hidraulikoa. 10-12 urteko umeentzat. Bi saio.
  • – 17:15-18:00 eta 18:15-19:00 | Udal frontoia: Nork esan du hemen ez direla izarrak ikusten? 8 urtetik gorako ume eta familientzat.
  • – 17:15-18:00 eta 18:15-19:00 | Udal frontoia: Gure zaborra eta zizareekin konposta egiteko prozesua. 9 urtetik gorakoentzat eta helduentzat. Bi saio.
  • – 17:15-18:00 eta 18:15-19:00 | Udal frontoia: Sateliteak erabiltzea klima-aldaketa aztertzeko. 9 urtetik gorakoentzat eta helduentzat. Bi saio.
  • – 17:30-18:00 eta 18:15-18:45 | Udal frontoia: Uraren zaindariak: etxeko arazketa-iragazkia. 8-12 urteko umeentzat. Bi saio.
  • – 17:30-18:00 eta 18:15-18:45 | Udal frontoia: Zinemaren magia: taumatropoak. 8-12 urteko umeentzat. Bi saio.
  • – 17:30-20:00 | Udaletxeko plaza: LED argiak; kodetik jokora. 7-12 urteko umeentzat. Saio irekia, parte-hartze librea.
  • – 20:00 | Udal frontoia: Txalaparta eta Zientzia Astearen amaiera.