Oinherrik, Artaziak kooperatibarekin elkarlanean, kultura-eskubideen eta kultur hezkuntza komunitarioaren inguruko jardunaldia antolatu du azaroaren 20rako. Topaketa Azpeitiko Dinamoan egingo da, 9:00etatik 13:30era, eta kultur eragileei, teknikariei, ordezkari politikoei, sortzaileei eta herritarrei zuzenduta dago. Ana Revuelta, Artaziak kooperatibako kidearekin hitz egin dugu jardunaldia kokatzeko.

Naiara Martin (oinherri) eta Ana Revuelta (Artaziak)

Jardunaldia Oinherri azkenaldian lantzen ari den lan-ildo berri baten barruan kokatzen da: kultur hezkuntza komunitarioa. Ekimenaren helburu nagusia herritarrek dituzten kultura-eskubideak mahai gainean jartzea da, herri hezitzailearen ikuspegitik kultura eta euskal kultura definitzea eta herrietan eskubide horiek praktikara eramateko proposamenak egitea.

Oinherriren ustez, kultura herritarren eskubidea da, eta komunitate bizigarriagoak, parte-hartzaileagoak eta hezitzaileagoak eraikitzeko funtsezko tresna. Horregatik, jardunaldiak hausnarketa teorikoa eta esperientzia praktikoak uztartuko ditu, herrietan kultur eskubideak sustatzeko aukerak partekatzeko.

Goizeko 9:00etan egingo dute harrera, eta 9:30ean emango diote hasiera jardunaldiari, Azpeitiko kultur zinegotziaren harrera instituzionalarekin eta Oinherriren ibilbidearen eta posizionamenduaren aurkezpenarekin.

Ondoren, 9:45ean, Ana Revuelta Artaziak kooperatibako kideak eta Iratxe Retolazak kultur hezkuntza komunitarioaren marko teorikoa aurkeztuko dute. 10:30ean, berriz, Naiara Martinek, aisia hezitzaile eta euskaltzean aritutakoak eta Oinherriko kideak, kultur hezkuntza komunitarioago baterako adibide bat azalduko du: herriko jaietako Umeen eta Nerabeen Egunak.

11:20tik aurrera, esperientzien azoka egingo dute, lau ekimen eta bizipen ezagutzeko:

  • Iruinkokoa: komunitatea plazara, Aritz IbaƱez Lusarreta dantzari, kazetari eta Iruinkokoaren sustatzaileetakoaren eskutik.
  • Kulturaz Azpeitiko Kultur Kooperatiba, sormen eta transmisio proiektuak hezkuntza arloan: Txinaurriak, Sorginorratzak eta Laiari. Amets Sorazu Agirrek aurkeztuko ditu.
  • Oiartzun: kultur politiketan parte hartzeko eskubidea, Garazi Urdampilleta Astibia Oiartzungo Udaleko zinegotziaren eskutik.
  • EHZ: nola iristen da gazte bat festibal bat antolatzeko motibazioa eta gaitasuna izatera?, Ainara Harotzarenek eta Kattina Haran Razinek, EHZko kideek, azalduko dute.

Azkenik, 12:30etik 13:30era, ariketa praktikoa egingo dute, galdera nagusi honen inguruan: zer gehiago egin dezake (udal)herriak kultura-eskubideak sustatzeko? 13:30ean emango diote amaiera jardunaldiari.

Oinherrik herritarrak eta kulturaren inguruan lanean ari diren eragile guztiak gonbidatu ditu topaketan parte hartzera, kulturaren dimentsio komunitarioaz hausnartzeko eta herrietan kultura-eskubideak gauzatzeko bide berriak elkarrekin eraikitzeko.