‘Konfiantzaren pedagogia’ izeneko liburua aurkeztu du Arizmendi Ikastolak

Azken urteotan Arizmendi Ikastolan jaso duten ezagutza batzen du Konfiantzaren pedagogia izeneko liburuak.

Arizmendiko berrikuntza pedagogikoko zuzendari Amaia Anterok idatzi du liburua eta ilustrazioak ikastolako irakaslea den Eli Villarek egin ditu. Aurkezpenean, ordea, obra kolektiboa dela azpimarratu dute. “Bertan azaltzen dugu konfiantzaren pedagogia zer den. Jende askoren ñabardurak eta ekarpenak jasotzen ditu liburuak, profesionalena zein gurasoena. Hezkuntza ikuspegi integral bat jasotzen du”, adierazi du Anterok.

Argitalpena interes pedagogiko minimo bat daukan edozein gurasorentzako edo hezkuntzako profesionalentzako eginda dago. “Terminologia edo erregistro aldetik saiatu gara irakurgai erraza egiten”.

Nagusiki Haur Hezkuntzan batutako ezagutzarekin egin dute liburua, eta hurrengo etapetarako jauzia modu koherentean egiteko ildo orokorrak finkatuz.