Matematikako eragiketak ikusiz, ukituz eta biziz ikasten dira

Arizmendiko irakasle Leire Aranak www.matematiketan.eus bloga sortu du, bereziki umeei begira. Zientzia “ederra” dena, era “ilun, iristezin, mekaniko eta aspergarrian” irakatsi izan dela uste du

“Azken urteetan sarriegi ikusi ditut ikasleak matematikekin sufritzen”. Arizmendi Ikastolako Leire Arana irakasleak, bizipen horretatik eta ama izan ostean bere semeetako bati laguntzeko beharretik, blog berezi bat sortu berri du: www.matematiketan.eus.

Blogaren planteamendua oso argi dauka Aranak: “Matematikak ukitu daitezkeen modu batetik hurbiltzea umeari, askotariko moduak erabilita. Goazen ohiko batuketei edo kenketei tripak ateratzera, eta gero joango gara abstrakzio bideetatik”.

Baina zergatik dago ikasle kopuru nahiko altu bat matematikekin sufritzen duena? “Faktore asko” daudela dio Aranak: “Erraza balitz arrazoiak zeintzuk diren zehatz-mehatz jakitea, emango genioke irtenbide bat, baina ez da horrela. Hala ere, uste dut oso faktore garrantzitsua dela umeari noiz aurkezten diozun kontzeptu berri bat. Askotan gertatzen da, 3 eta 6 urte arteko umeengan, ez daudela gertu oraindik abstrakziorako urratsa egiteko”. Horrez gain, orain arteko irakaskuntzaren ikuspegia ez du uste egokiena izan denik: “Ez dakit nondik datorren gaur egungo matematikaren ikuspegia, baina bai dakit berez gai ederra dena ilun, iristezin, mekaniko eta aspergarri bilakatu dugula irakasleok eta testu liburuek elkarlanean. Gaiak berez dauzkan jostagarritasuna, ukigarritasuna eta naturaltasuna galdu ditu”.

Elur-bola efektuaren bila  

Bigarren Hezkuntzan zenbait urtez irakasle izan ostean, ama zela deskubritu zuen matematika ukigarrien “mundu zabal” hori: “Nire umeetako bati laguntzeko beharretik ezagutu nuen eta konturatu nintzen hori dela bidea. Elur-bola handia egin aurretik elur-bola txikiak behar izaten dira, eta uste dut kasu honetan ni izan naizela elur-bola txiki hori”. Erabat sinistuta dago matematikak modu ukigarrian irakasteko moduek gero eta presentzia handiagoa izan behar dutela ikasgelan.