Txabolak edo etxetxoak eraikitzeko zaletasunaren atzean zer dago?

Nork ez ditu haurtzaroan txabolak edo etxetxoak eraiki? Denok egin dugu eta gure seme-alabek ere oso gustuko dute. Baina zer dago jolas horren atzean?

Haurrek edozein tokitan egiten dituzte etxeak. Mahai azpian, logelan, lorategian… eta edozerk balio du etxetxoa eraikitzeko: izarak, mantak, arropa esekitzeko pintzak, makilak, oihalak, egurrezko taulak….

Etxetxoa eraikitzearen ekintzaren aurretik lan handia egin du umearen adimenak. Pentsatu du non, nola, zerekin, norekin… Eta pentsatu du berea izango den gordelekua eraikiko duela. Bere txokoa, bere unibertsoa.

Etxetxoa, gainera, eraiki eta deseraiki egin daiteke. Ez da zerbait finkoa. Eta jantzi egin behar da, okupatu egin behar da eta antolatu nork bere gustura. Ez da hortaz estalki bat alderik alde zabaltzea soilik. Espazioa okupatzea suposatzen du eta espazio horri esanahia ematea.

Nork bere txokoa eraikitzen duenean bere gustura ipintzen du eta nork bere arauak ezartzen ditu. Umeak eraikitako eremu horretan arauak beste batzuk dira eta rolak ere beste batzuk dira. Ekintza bakoitzak bere esanahia du, umeak aukeratzen duen esanahia. Nork bere arrastoa utz dezake bertan.

Beraz, haurtzaroko jolas arrunta dirudien horrek garrantzia handia du. Umeek bere egiten dute eremu bat. Txoko hori munduan duten unibertso txikia da.

Eraiki izan dituzu etxetxoak txikitan? Eta zure seme-alabek eraikitzen dituzte? Zure esperientzia gurekin elkarbanatu nahi baduzu hemen duzu aukera!