Frantziako Osasun Ministerioak bederatzi erditze-etxeri eragingo dien bost urteko probaldia baimendu du. Erditze-etxe horiek aukera ematen dute ospitalea ez den zentro batean erditzeko. Beste modu batera esanda erdibideko aukera dira nork bere etxean erditzearen eta ospitalean erditzearen artean.

Captura de pantalla 2016-04-26 a las 22.16.13

Emaginak dira erditze-etxeetan arduradun nagusiak, eta baldintzetako bat da ospitale batetik gertu egotea. Erditze-etxeetan, bestalde, arriskurik gabeko haurdunaldiak soilik arta daitezke. Zentro horietan haurdunaldia, erditzea eta erditzearen ondorengo prozesua jarraitzen dituzte, eta ospitalean baino zerbitzu pertsonalizatuagoa ematen dute.

Frantziako Osasun Ministerioak abenduaren 26an argitaratu zuen ofizialki probaldiaren berri ematen duen erabakia. Bi urte barru, 2017. urtearen amaieran, lehenengo balorazioa egingo dute. Frantziako Osasun Ministerioak bederatzi erditze-etxeri eman die baimen berezi hau, eta ez dute besterik baimenduko probaldia amaitu bitartean.

Zer da erditze-etxea?

Lehenago esan moduan emaginak arduratzen dira erditze-etxeetan ematen den zaintzaz. Harrera leku bat da haurdun dauden emakumeentzako eta haien familientzako. Erditu ostean emakumeak ez dira ospitalizatzen, eta nor bere etxera itzultzen da. Erditze ondorengo prozesua egiteko emaginak ibiltzen dira etxez etxe.

Erditze-etxe guztiek izan behar dute harreman zuzena gertu dagoen obstetrizia zerbitzudun osasun zentro batekin eta elkarlanak estua behar du, gehienbat urgentziazko lekualdatze bat beharrezkoa suertatzen bada. Bestalde, erditzeko dauden emakumeei aukera eskaini behar diete unean-unean euren nahiak eta erabakiak entzun eta errespetatzeko. Aukera egokia dira etxean erditu gabe ingurune goxoagoa eta ez hain medikalizatua nahi duten emakumeentzako.

Emaginen egitekoa

Erditze-etxe batean emaginek jarraipen pertsonalizatuagoa eskaintzen dute. Emagin bat baino gehiago daude etxe bakoitzean eta haurdun dagoen emakumearen eta haren familiaren jarraipen globala egiten dute (haurdunaldia, erditzea, erditze-ondorena…). Hala, erditzeko unean emaginak ondo ezagutzen du emakumea. Badaki zer nolako erditzea nahi duen baita zeintzuk diren bere aurreikuspenak eta bere beldurrak.

CIANE erakundeak 2012an Frantzian egindako inkesta baten arabera erditzeko unearekin lotuta eskaerak egindako emakumeen %37-k uste du ez zela bere iritzia errespetatu. Egindako eskaerek zerikusia zuten mugimendu askatasunarekin, minaren inguruko laguntza pertsonalizatuarekin edo episiotomiarekin.

Askotariko iritziak

Frantziako Osasun Ministerioak hartutako erabakiak zeresan handia eman du. Erditze-etxeak baimendu izanak aldeko eta kontrako iritziak sortu ditu. Aldekoek, gehienetan, indarkeria moduan bizi dute osasun sistemak ezartzen dituen protokolo estandarrak. Kontrakoek, berriz, arrisku handitzat dute bai jaioberriarentzat zein erditzeko dagoen emakumearentzat protokolo horien falta.

Frantzia ez da aitzindaria

Frantzia ez da aitzindaria erditze-etxeen aldeko ekimenean. Suitzan, Belgikan, Alemanian, Austrian edo Suedian ibilbide luzeagoa egin dute. Baita ere Ameriketako Estatu Batuetan. Birth center izenpean ezagutzen dituzte erditze-etxeak. 1975. urtean zabaldu zuten lehenengoa New York hirian.

Informazioaren iturria (frantsesez) hemen.