Arrakasta lortu beharrak gaixotu egiten ditu gure seme-alabak

Ameriketako Estatu Batuetako Irvington herrian argi dute. Makina bat azterketa eta ikerketa egin ostean konturatu dira belaunaldi berriek emaitzak lortzeko presio handia dutela, handiegia. Presio horrek eraginda estresatuta bizi dira, eta antsietate handiarekin. Horrek eragin zuzena du gazteen zoriontasun mailan, emaitza akademikoetan eta osasun egoeran. Neurriak hartzen hasi dira.

Stuart Slavin pediatra eta Misuriko Saint Louis unibertsitateko medikuntza fakultateko katedraduna da. Medikuntza eskolak ematen ditu eta susmoa hartuta ikasleen estres maila neurtzeko ikerketa abiarazi zuen. Zur eta lur gelditu da ikerketa horrek utzitako ondorioekin.

Estresa epidemia bihurtzen ari da eta zabaltzen doa gero eta adin txikiagoko ikasleen artean. Sistemarengandik, gurasoengandik edo gizartearengandik egiten zaizkien lorpen eskakizunak neurriz kanpokoak izatera iritsi dira eta horrek arazoak sortzen ditu.

Haurtzarotik hasita ingurukoek umearentzako aukeratzen dituzten jarduera guztiak (eskolakoak zein eskolaz kanpokoak) ibilbide profesionalean urrats bat gehiago emateko dira: unibertsitate on batean sartzeko, lan on bat lortzeko, bizitza arrakastatsua izateko… Eta bizitza arrakastatsua lortu behar horrek neska-mutikoen osasuna kaltetzen ari da. Hezkuntza sistema modernoa umeak gaixotzen ari dela ondorioztatu dute.

Hainbat ikerketetan egindako neurketek erakusten dute estresak tristura eta depresioa sortzen dituela, eta askotan eskola izaten da estres iturri. Gero eta gehiago dira ultzera eta migraina arazoak dituzten adin txikikoak.

Adituen ustez ezinbestekoa da exijentzia maila parametro egingarrietara ekartzea. Estresak jotako haurtzaro batek arazoak ekartzen ditu helduaroan eta pertsona horrek gaixotasunak garatzen ditu helduaroan: depresioa, antsietatea… orokorrean osasun eskasa du.

Gainera, bada mekanismo horretan kontraesanekoa den efektu bat adituen esanetan: denboran luzatu eta pilatutako presio egoerek eragin kaltegarria dute emaitza positiboak lortzeko bidean. Larregiko presiopean dagoen haur batek nekez lortuko ditu eskatzen zaizkion emaitzak.

Albistearen eta irudiaren iturria hemen.