Udan, orokorrean,  aisialdirako denbora luzeagoa izaten da; adibidez, irakurzaletasuna asetzeko. Irakurtzeak onura handiak dituelako, komenigarria da irakurtzeko ohitura lehenbailehen hartzea. Idurre Alonso literatura arloan aditua den Huheziko irakaslearen esanetan, txiki-txikitatik hasten da irakurtzearen garrantzia. “Hasieran, helduok izaten gara umeei irakurtzen diegunak, eta ostean, eurek hasten dituzte bakarkako irakurketa-abenturak. Irakurtzea mundua ezagutzeko tresna da, baina ez da hori bakarrik. Egunerokotasunetik atera eta beste istorio batzuetan murgiltzeko aukera ematen digun tresna da: burua lantzekoa, imajinazioa garatzekoa, trebetasun komunikatiboak garatzekoa…. Hori horrela, gazte eta nerabeek testuak irakurtzeak berebiziko garrantzia dauka. Eurek eraiki behar dutelako mundua interpretatzeko euren era, eta irakurtzeak –eta askotariko gauzak irakurtzea– bide emango dielako etorkizunean herritar autonomo eta kritiko izateko”.

Captura de pantalla 2016-07-18 a las 12.41.47

Kontsumitzeko bakarrik ez

Edozein kasutan, kulturak sortzaileak behar dituela dio Alonsok: “Alde horretatik, irakurketa sorkuntzarekin lotu behar genuke, ezinbestean”. Kultura ez dela kontsumitzeko bakarrik azaldu du, eta, horregatik, “gazteak sorkuntzarako ere” prestatu behar direla. “Sortzeko, baina, sortuta dagoena ezagutzea ezinbestekoa da”, gaineratu du. Irakurtzeak ez du, baina, zaletasunera mugatuta egon behar, Alonsoren esanetan: “Hezkuntza sistemak helburu izan behar du herritar jantziak heztea, euren kulturaren ezagutzaile direnak”.

Gazte literatura ez da bigarren mailakoa

Huheziko irakaslearen iritziz, “gabezia ez dago literaturan, gazteek dakarten irakurketa ohitura faltan eta euskara gaitasunean baizik. Gaur egun, euskal literaturak denetariko liburuak ditu, gai aldetik eta baita forma aldetik ere”.

Idazleak ere asko daude. “Koldo Izagirrek ere badu gazteentzako idatzitako literatura. Beraz, halako idazle handi batek gazte literatura idazten badu, argi dago ez dela bigarren mailako literatura. Aztertzekoa litzateke eskoletan irakurtzen den literatura kalitatezkoa ote den edo merkatu irizpidearen arabera hautatzen ditugun irakurgaiak”.

Euskaraz ala gazteleraz?

Ez ditu, inondik ere, parean jartzen euskaraz edo gazteleraz irakurtzea. “Euskal kultura euskaraz sortutako kultura gisa definitzen dut nik, euskaratik eta euskaraz sortua. Horregatik, bada, euskaraz sortutako lanak irakurtzeak badu gehigarri garrantzitsu bat: euren kultura ezagutzeko tresna dela. Beste hizkuntzetan irakurtzea aberasgarria da, zalantza gabe, baina ez maila berean. Alarmaren argi gorriak pizteko moduko egoeran gaude”.

(Iturria: Puntua)