Gehiegi babesten ditugu umeak?

Guraso ugari haserrarazi eta polemika piztu du AEBetako Arkansaseko Catholic High School for Boys ikastetxeko atarian jarritako kartelak: “STOP, zure semearen liburua ekartzera etorri bazara eskolara, segi etxera bueltan”.

Puntua aldizkarian guraso bati, hezitzaile bati, irakasle bati eta psikologo bati egin diote galdera: umeak gehiegi babestuta al daude?

Unai Serrano – Psikologoa

“Helburua gurasoak kontzientziatzea bada, horrelako kartel batek ez du askorik lagunduko… Badira beste bide batzuk. Horrek agerian uzten du ikastetxearen eta gurasoen arteko harremana ez dela osasuntsua. Semeak dedikazio galanta behar du, ez gauzak bere ordez egiteko, baizik eta heziketa aproposena aurkitzeko. Erantzukizuna da transmititu beharreko balioetako bat. Gaia erantzukizunez lantzen ari dira eskola eta gurasoak?”.

Lander Juaristi – Gurasoa

“Bai! Uste dut askotan gehiegi babesten ditugula. Beldur asko izaten ditugu, ez dugu gure seme-alabentzako txarrik nahi eta babestera jotzen dugu, askotan gehiegi. Gure seme-alabek arriskua ere behar dute garatzeko eta horretaz jabetzea kosta egiten zaigu gurasooi. Haur autonomoak nahi ditugu, parte hartzaileak… Hori guztia landu egin behar dugu, haurrei gauzak gaizki egiteko aukera ere eskaini behar diegula pentsatzen dut”.

Joseba Gabilondo – Hezitzailea

“Orokorrean gaur egungo haurrak gehiegi babesten direla uste dut. Alde batetik, logikoa ere bada helduek haurrak babestu nahi izatea. Dena den, gehiegizko babesarekin bizitzako hainbat erronka ezkutatzeko arriskua dagoela pentsatzen dut, eta haurraren garapenean aberasgarriagoa da, nire ustez, erronkak ezkutatu baino, horren aurrean sostengua eskaintzea eta haurrak nahi badu laguntza hori onartzea”.

Maddi Urkia – Irakaslea

“Guraso bakoitzak bere seme-alabaren hezkuntzan hartzen dituen jokabideak zilegi dira, guraso orok nahi duelako bere haurrarentzako hoberena. Kasu batzuetan haurrak gehiegi babesten dira eta sarritan horrek ez dio laguntzen haurrari bere autonomia eta identitatea garatzen. Umeak, zailtasunak kudeatu eta bere gaitasun guztiak garatu ahal izateko, konfiantza izan behar du eta hori eraikitzen laguntzea garrantzitsua da”.