Umeentzat moldatuko ditu webguneak Googlek

Helduentzako edukiak dituzten webguneetan ohikoa da sarbidean bertan adina eskatzen duen formulario bat bete behar izatea. Adingabeei sarbidea galarazteko neurria da, legez nahitaezkoa, baina haur batek gezurra esanda, sartzeko trabarik ez luke izango.

Hori dela-eta, Google bere zerbitzuak moldatzekotan da. Txikienen behar zehatzetara moldatu eta egokitutako webgune eta zerbitzuak eskaintzen hasiko da bilaketen handikia laster.

Esate baterako, Youtube bideo zerbitzuaren bertsio egokitu baten hasi dira jada lanean. Zenbait bideo galarazita egoteaz gain, gurasoek zuzenean kudeatuko lukete seme-alaben kontua. Planteamendu berdintsua izango lukete GMail postari eta Chrome nabigatzaileari dagokienez.

Hazten jarraitzeko

Estrategia horrekin, sarbidea galarazi barik, nabigazioa mugatzea izango litzateke Googleren helburua. Horrekin hazten jarraituko lukete, halako soluzioek geroago eta eskari handiagoa dute-eta gurasoen aldetik.