Ikas Komunitatea izeneko ereduan tertulia dialogikoak bultzatzen dituzte ikasleen gaitasunak ahalik eta gehien garatzeko eta ikastetxean elkarbizitzarako jardunbide onak sustatzeko. Biolentziaren prebentziorako baliabideak ere ematen ditu Ikas Komunitateko ereduak.

Bultzatzaileek azaltzen dute hezkuntza komunitate zientifikoak egiaztatuta daukan sistema dela eta emaitza onak ematen dituela. Hainbat dira eredu honen barruan lantzen diren esparruak: tertulia dialogikoak egiten dira ikasleekin, talde elkar eragileak sortzen dira komunitate osoaren inplikazioaren (gurasoak, aiton-amonak, ikasle ohiak…) eta gurasoen zein irakasleen arteko tertulia pedagogikoak egiten dira. Jarrera desegokiak identifikatzeko tresna baliagarriak ematen dituela diote horretan dihardutenek eta garrantzitsua dela jarrera desegokia izan duen pertsona baztertu beharrean jarrera baztertzea.

Txikienei ipuinen bitartez aurkezten diete gaia eta ikusarazten diete ezinbestekoa dela biolentziaz jantzitako gertakariei dagokien lekua eta garrantzia ematea.

Nagusiagoekin tertulia kurrikular dialogikoak egiten dituzte. Testuen bitartez lantzen dute gaia eta aztertzen dute nerabezaroan nola eraikitzen diren erakargarritasun ereduak. Ondorioak eta emakumeen kontrako biolentzia lantzen dituzte abiapuntu hori hartuta.

Isiltasunaren araua

Ikasleak isiltasunaren araua apurtzeak duen garrantziaz jabetzen saiatzen dira metodologia horren bitartez. Jazarpen egoera bat ematen bada garrantzitsua dela jakitera ematea. “Ulertu behar dugu salaketa egiten duena ez dela salataria baizik eta ausarta dela gertakari horren aurrean beste aldera begiratu ez duelako”. Oñatiko Elkar Hezi ikastetxean eman dizkigute xehetasun gehiago.