Itsaso Pagoaga: “Jostailu on batek haurraren beharrak ase behar ditu”

Itsaso Pagoaga Haur Hezkuntzako hezitzailea da, urte batzuetan Txatxilipurdi aisialdi eta euskara elkartean lanean aritutakoa. Guraso.com-en jolaserako baliabideen inguruan idatzi ohi du, guraso eta helduei haurrekin euskaraz jolastu eta ondo pasatzeko baliabideak eskainiz. Baina sarean bakarrik ez, zuzenean ere eskaintzen ditu aholkuak.

Zer da jostailu on bat?
Jostailu on bat izango litzateke umearen beharrak eta ezaugarriak kontuan hartzen dituena. Ez da berdina bi urteko edo sei urteko ume batentzako jostailua erostea, eta adin berekoen artean ere, ume bakoitza mundu bat da eta bere ezaugarriak dauzka. Kontuan hartu behar da, jostailua haurraren garapenerako tresna dela, mundua ezagutzeko aukera zabaltzen diona.

Ze gako hartu behar dira kontuan jostailu bat erosterakoan?
Jostailua dibertigarria izan behar da, interesa mantentzeko gaitasuna izan behar du, haurraren irudimena eta sormena sustatu behar ditu eta sozializatzen lagundu behar dio. Horrez gain, estetika garrantzitsua da, eta materialek ere badute garrantzia, batez ere segurtasunari begira. Dudarik gabe, sexu bereizketarik ere ez lukete egin behar.

Iragarki eta katalogoetan horrelakoak ikusten al dira?
Sasoi hauetan katalogo eta iragarki ugari iristen dira haurrengana, eta gomendatzen dudana da, adibidez, gurasoek katalogoak haurrekin batera ikustea. Izan ere, iragarkietan agertzen dena ez da %100 erreala, eta komeni da, haurren gaitasunaren arabera, publizitatea aztertu eta interpretatzen irakastea, etorkizunean euren kabuz egin dezaten. Zergatik agertzen dira panpinekin neskak bakarrik eta autoekin mutilak bakarrik? Ez da kasualitatea, eta orain sasoi aproposa da haurrekin hori guztia lantzeko.

Dena den, askotan kartoizko kaxa bat edozein jostailu baino hobea izan liteke, ezta?
Hori da. Kartoizko kaxa bat, eurentzat, mila eta bat jolas aukera eskaintzen dituen tresna da. Jostailu asko izatea ez da garrantzitsuena. Jolaserako lagunak izatea, adibidez, garrantzitsuagoa da, eta hori da, nire ustez, bermatu beharko litzatekeena.

Betiko jolasek ba al dute arrakastarik oraindik?
Noski; izan ere, batzuk atenporalak dira, eta oraindik aproposak. Dena den, gaur egun, indarra hartzen dabilen jolas mota teknologikoa da, eta alde positibo zein negatiboak izan ditzake, erabileraren arabera eta, nik uste, hori haurrekin eurekin adostu eta arautu behar dela.