Autoan goazenean oso garrantzitsua da segurtasun arauak betetzea, eta herri batzuetan hasita daude guraso izateko prestaketa saioetan gai horren inguruko aurkezpenak. Irunen, Donostian, Zarautzen, Hernanin eta Oñatin egiten dituzte. Kasu gehienetan, udaltzain bat izaten da azalpenak ematen dituena.

Indarrean dagoen araudiak segurtasun aulkitxoa erabiltzera behartzen du haurrak 1,35 metroko garaiera izan arte. “Ume bakoitzak bere ezaugarriak ditu eta aulkitxoak pisuaren edo garaieraren arabera sailkatu ohi ditugu”, adierazi du Oñatiko osasun zentroan Eñaut Unamuno udaltzainak. “Gaur egun bi motatako aulkiak daude: pisua kontutan hartzen dutenak edo garaiera kontuan hartzen dutenak. Esaten denez garaiera kontuan hartzen dutenak jarraituko dute aurrera, eta besteak poliki-poliki desagertzen joango dira”. Unamunok ohartarazten du garrantzitsua dela segurtasunerako aulki bakoitza erabiliko duen umearen ezaugarrietara egokitzea.

Kontrako noranzkoan

Umeak atzera begira joatea komeni dela azpimarratu du udaltzaingoak. “Jaioberriak direnean legez da derrigorrezkoa”, azaldu du. “Arrazoia da ume jaioberri batek buruan duela pisuaren zati handiena. Aurrera begira joango balitz kolpe baten ondorioz lepoko lesio garrantzitsuak izan ditzake. Atzera begira joanez gero, aldiz, babestuago doa alde horretatik”. Arrazoi horregatik autobusean, taxian, trenean… umeek beti kontrako noranzkoan esertzeko gomendioa egin du udaltzainak.

Merkatuan aukera oso zabala dago, baina aulkiek bere homologazioa behar dute. Dendarientzako ere ikastaroak antolatzen direla esan du udaltzainak.

Haurra autoan eramateko leku seguruenaren inguruan galdetuta Unamunok jakinarazi du umeak atzeko aldean joan behar dutela beti eta atzeko aldean lekurik seguruena erdikoa dela. “Gertatzen dena da askotan leku estua dela eta aulkitxoak jartzeko arazoak egon daitezkeela”. Erdiko eserlekuaren ondotik estatistikek diote hurrengo leku seguruena kopilotuaren atzekoa dela eta ondoren gidariaren atzeko aldea.