Ekin Emakumeak elkarteak eta Aman Guneak antolatuta haurdunaldi kontzientearen inguruko tailerra egin du Maria Cruickshank doulak Arrasaten.

Haurdunaldia era kontzientean bizi dugu gaur egun zure ustez?

Denetarik dago, eta gero eta gehiago ematen dela uste dut. Dena den, nire ustez badago kontu bat oso garrantzitsua dena: emakumeek eta orokorrean gizakiok gurekiko dugun konexio eza. Hain justu ere, haurdunaldia eta erditzea dira bi une konexio bereziki handia eskatzen dutenak. Hainbeste urteko patriarkatuaren ondorioz emakumea hain zapalduta dago eta bere zentzutik hain aterata modu erabat kontzientean bizitzea zaila dela. Ahal dugun neurrian bizi dugu egoera, eta bide handia dago egiteko. Gure gorputzari eta gure senari kasu gehiago egin beharko genieke.

Begirada patologikoa dagoela uste duzu?

Erabat. Haurdunaldia, erditzea eta edoskitzea dira biologikoki emakumeen une indartsuenetako batzuk, eta emakume askok diote ez dakitela nola jokatu. Delegatu moduan egiten ditugu gauzak. Dena ikasi behar dugula uste dugu, eta badakigu. Prest gaude horretarako. Senetik ateratzen zaigu.

Begirada patologikoa dago eta hori aldatu egin behar da. Haurdun gelditzen gara eta osasun proba pila egiten dizkigute. Ideia orokorra da gauzak ondo badoaz zorteko garela, eta hori ez da horrela. Gauzak ondo joatea biologia kontua da.

Senarekin konektatzeaz egiten duzu berba.

Emakumeari konfiantza ematen badiozu eta benetan barrura begiratzen badu normalean badaki zer sentitzen duen eta zer egin gura duen erditzeko unean. Badaki zein den bidea. Baina hain kutsatuta gaude askotan ez dugula bide hori ondo ikusten. Gero, gainera, hainbeste gauza esaten dizkigute: nola egin, nola ez egin… Azkenean ez dakizu zer sentitzen duzun eta nondik sentitzen duzun. Beldurretik jokatzen dugu askotan. Hau egin behar dut ez dakit nork esan didalako egiteko, baina burua eta gorputza astindu behar ditugu eta estereotipoak, mito faltsuak eta beldurrak uxatu.

Haurdunaldia da emakumearen osasun aldi oparoena?

Bai, eta ikuskera aldatu behar dugu. Gaur egun haurdun zaude eta mila proba egin behar dituzu. Beldurtuta egon gaitezke, baina konfiantza berreskuratu beharra dugu gure buruengan. Tipulak bezala kapa asko ditugu, eta kentzen joan behar gara. Gauza pila desblokeatuko ditugu horrela.

Erditze aktiboari eta jaioberrien beharren inguruan ere egingo dituzue tailerrak laster.
Bai. Lehenengoa otsailaren 24an eta bestea martxoaren 10ean. Lehenengoan azalduko dugu erditze fisiologiko bat zer den, eta zer gertatzen den amaren garunean, hezurretan, gorputzean… eta umearen bidea zein den. Laguntzaileak edo bikotekideak jakin behar du zein behar dituen erditzekoa den emakume horrek. Dinamikak egingo ditugu bikotekideekin ere.

Martxoaren 10eko tailerrean idealizatuta dagoen amatasunari buruz hitz egingo dugu. Umea jaio eta gero talkak sortzen dira bikotean. Konexio kontua da eta lagundu egin behar da. Hitz egin behar da. Ama eta ume horrek zein behar fisiologiko eta psikologiko dituzten jakiteak asko laguntzen du. Ez da kapritxo kontu bat, osasun kontu bat da eta prebentzio lana egin behar da. Gizarte honetan ikusten ditut aita asko ume moduan jokatzen, eta hor aldatu egin behar da ikuskera. Edoskitzeari buruz, kanguru metodoari buruz…

Elkarrizketa entzungai hemen