Herriko eragileen kokapena eta herritarren eskura dagoen hezkuntza eskaintzaren sailkapena kontuan harturik herriko hezkuntza mapa egin du Arrasateko Udalak. Arrasateko heziguneak 2018 du izena eta 215 orriko dokumentua da. Udal webgunean dago zintzilikatuta  pdf formatoan.

“Egun, hezkuntza kontzeptua eskolaz harago doa. Testuinguru horretan udalerriak eremu hezitzaileak dira eta herritarrak eragile hezitzaileak. Hala, hezkuntza tipologia guztiek—formalak zein ez formalak— osatzen dute esparru hezitzailea”, adierazi dute udaletik.

Herriko eragileen kokapena eta egiten den hezkuntza eskaintzaren sailkapena egin dute informazio horren araberako herriko hezkuntza mapa osatzeko. “Lliburuxkan herritarrek aukera izango dute modu interaktiboan eta klik baten bidez elkarteen webguneetan sartzeko zein herriko eragile guztien hezkuntza eskaintza ezagutzeko eta saretzeko. Horrekin batera, herriko elkarteen zein eragileen helbide elektronikoa dago haiekin harremanetan jartzeko”.

Mapan, bestalde, intereseko hainbat guneren kokapena jaso dute. Hala nola, eskolak, ikastetxeetako jolastokiak eta kirol esparruak, ziburuen parkeak, berdeguneak, heziketarekin lotutako eragileak, bidegorriak… “Beste eragileren batek gida honetan azaldu edo jasotako informazioa aldatu nahi badu, Arrasateko Udalaren hezkuntza sailarekin jar daiteke harremanetan 2020. urtean egingo delako heziguneen beste katalogo bat”, jakinarazi dute.