Arrasaten berritu egin dute Biteri jolas parkea, eta nortasuna eman dion elementu arrasatear bat jarri dute. Arrasateren eta dragoiaren kondairari erreferentzia egiten dion dragoi itxurako jolasa jarri dute. Dragoiaren diseinuak, gainera, badu bitxikeria bat. Ideia lehiaketa bat egin dute eta haur batek egindako marrazkian oinarritu dira jolasa egiteko.

 

Arrasate Gure Herria liburuan jasotako ipuinak dio antzina bazegoela Murugainen Arrasateko herritarrak beldurtzen zituen herensuge bat. Animalia handi hark zerga bat ezarri zien arrasatearrei: urtero, herriko neskaren bat eramatea.

Eta, urtero urtero, Mandoin izeneko mendi magaletik herrira jaisten zen neskaren bila. Eta, arrasatearrek dragoiarekin topo ez egitearren, neska bat uzten zioten Txoxagorri izeneko aldapan, hartu eta jan zezan. Baina, urteak aurrera joan ahala herritarrak aspertzen hasi ziren gehiegikeria hartaz. Hortaz, herritar bati bururatu zitzaion argizarizko neska bat egitea eta herensugeari uztea.

Hala, herensugearen urteroko eguna etorri zenean argizarizko neska jarri zioten Txoxagorrin. Herensugea ez zen konturatu eta jaten hasi zen; eta argizaria urtzen hasi zitzaion. Orduan, gordeta zeuden herritar batzuek burdinoletan gori-gori jarritako burdin eztenak hartu eta gorputzean sartu zizkioten dragoiari. Dragoia hil egin zen eta aurrerantzean pozik bizi izan ziren arrasatearrak.

Barikuan zabaldu zuten jolas parke berria Arrasaten. Pozik estreinatu zuten neska-mutikoek. Lanen aurrekontua 118.940,77 eurokoa izan da.