Gero eta handiagoa da adimen emozionalari ematen zaion garrantzia. Adituek ziurtatzen dute oso txikitatik landu behar dela eta gero eta ikastetxe gehiagotan jorratzen dute gaia. Ikasleentzat, irakasleentzat eta gurasoentzat antolatzen dituzte formazio saioak.

Gaurkoan adimen emozionala lantzeko egokiak diren hiru film laburren erreferentziak eman nahi dizkizuegu. Ez dira mutuak, baina ez daude hizkuntza jakin batean oinarrituta, beraz edozein hizkuntzatan landu daitezke.

 

1. Monsterbox:

Zazpi minutu eta erdiko iraupena du. Adiskidetasun istorio bati buruzko film labur dibertigarria eta hunkigarria da. Egileak dira Ludovic Gavillet, Lucas Hudson, Colin Jean-Saunier eta Dérya Kocaurlu. Frantziako Lyon hirian dagoen izen handiko arte eta diseinu eskola bateko ikasleak dira laurak eta Monsterbox txikien zein helduen bihotzetara heldu den lana da. Bi protagonistak zeharo desberdinak ditu istorio honek, baina guztiaren gainetik adiskidetasuna baloratzen dute. Hala, ikasten dute akatsak onartzen eta horietatik ikasten.

 

2. Zubia:

Ez da hiru minutuko iraupenera heltzen. Lan honek erakusten du taldean lan egiten. Orein bat, untxi bat, hartz bat eta mapatxe bat dira protagonista, eta bidaltzen duten mezua da mundu honetan denentzako dagoela lekua baldin eta elkarlanerako prest bagaude. Zubi estu bat zeharkatzeko unea jasotzen du film laburrak. Hartzak eta oreinak talka egiten dute eta ez dira ados jartzen. Untxiak eta mapatxeak, ordea, elkar laguntzen dute eta oztopoak gainditzea lortzen dute horrela.

 

3. Chicken or the egg:

Lau minututik beherako film laburra da honakoa, eta umore eta maitasun kutsu handia du. Txerritxo baten istorioa kontatzen du. Txerritxo honi asko gustatzen zaio arrautzak jatea, baina egun batean oilo bat ezagutzen du eta maitemindu egiten da. Eta aukeratu egin beharko du, arrautza edo oiloa.