Aurtengoa, ez da lehen aldia Zestoako gaztelekuan sedukzio tailerra eskaintzen dutena. Aurreko urtetan ere, eskaini izan dituzte bai eskolan eta baita gaztelekuan ere, hainbat eratako formakuntzak, tratu onak lantzeko. Oraingoan, 14 eta 17 urte artekoei eskainitakoa izan da, eta saioa dinamizatu duen Arremanitzeko sexu-hezitzaile Ainhoa Aira Calerok eman du horren berri.

Nolakoa izaten da sedukzio tailerra? Zer eskaintzen duzue?

Sedukzio tailerretan bilatzen duguna da jolasaren bitartez, hitzak esaten duen moduan, sedukzio eta ligoteo munduan sartzea, baina betiere tratu onen begirada batetik; mugak kontuan hartuta, nola sartu bestearen espazioan inbaditu gabe… Agian gizartean dagoen ligatzeko eta seduzitzeko modua zalantzan jarriz.

Gazteek gustura hartzen dituzte horrelako saioak? Parte hartzera animatzen dira?

Bai. Normalean oso gustura hartzen dituzte. Horrelako espazioak ez dira oso ohikoak, eta gainera, pandemia garaian ligoteoari eta sedukzioari eskaintzen zaizkion espazioak are eta txikiagoak dira. Izan ere, parranda girora mugatu izan da askotan. Eta orain, ikusi dugu pixka bat nola eskoletan ere sortu diren seduzitzeko eta ligatzeko espazioak. Baina tailer hauek dira baita beste toki baten jolasteko eta pentsatzeko, eta normalean oso gustura eta oso parte-hartzaile egoten dira gazteak. Aukerakoa izaten da eta izena ematen duena normalean gogotsu etortzen da.

Pandemiak ekarri du orduan eskoletan ere ligatze horiek gertatzea?

Bai, nik uste dut betidanik egon izan dela. Azkenean eskola bada sozializatzeko leku bat, gazteagoekin, adinekoekin… jolas moduko bat badagoela esango nuke. Eskolan jende asko dago eta pandemia garaian beste eremu batzuk ez daudenez, adibidez ez dago parranda girorik, jende berria ezagutzeko nik eskolatan, gela batzuetan, bai atzeman dudala gogo hori jolasteko. Agian, lehen baino indar gehiago hartu du sedukzioak eskolan.

Mugikorrak, sare sozialak… horiek ere aldatu dute seduzitzeko edo ligatzeko modua?

Bai, noski. Tresna zentrala da, ligatzeko behintzat oso garrantzitsuak dira sare sozialak, bereziki Instagram, Snapchat eta txata dutenek eta argazkiak bidaltzeko eta horiek komentatzeko aukera ematen dituzten sare sozialak asko erabiltzen dituzte gazteek elkarrekin dibertitzeko.

Tratu onen ikuspuntutik lantzen duzue gaia beti.

Alde batetik saiatzen gara zalantzan jartzen gaur egun ditugun eskemak sedukziorako edo ligatzerako orduan. Guk ligoteoaren edo sedukzioaren definizio bezala erabiltzen dugu besteen espazioan artez sartzea. Orduan bestearen espazioan sartzen zaren horretan, kontuan hartu behar dira gauza asko. Adibidez, norberaren eta bestearen mugak errespetatzen jakitzea, botatzen ditugun piropoak nolakoak diren…

Eta esango zenuke gazteak orokorrean jabetzen direla horrekin guztiarekin?

Batzuk bai eta beste batzuk ez. Egia da orokorrean ezjakintasun handia izaten dutela eurek; askotan guregana jotzen dute galdetzera nola ligatu edo nola seduzitu, edo nola gerturatu gustatzen zaien pertsona horrengana, ez dakitelako ondo zer egin. Hor atzean ere badago ezezkoa jasotzeko beldur handia eta hor lanketa sakona egin beharra dago. Baina bestela, uste dut teorian behintzat oso argi dagoela errespetua eta mugen kontzeptua.

Zein hausnarketa egiten dituzue tailerrean?

Guk bukaeran ematen dugun mezua hauxe da: jolastu plazeretik eta sedukziotik, zuk zure burua zainduta. Guk igortzen diegun mezua da denok garela seduzitzeko gai, jaiotzez, eta ausarta izan behar duzula eta tresnak jasotzeko eta praktikatzeko, esperientzia eta gauza berriak probatzea behar dela, baina guk beti jolasa aldarrikatzen dugu; plazera eta jolasa.