Bilbo Rock espazioan aurkeztu dute Haziak Astialdira txostena Euskadiko Gazteriaren Kontseiluak, Alboan GKEak eta Errotik kooperatiba feministak. Lanketa horrek hainbat galderari erantzun nahi izan dio. Horien artean dira, esaterako, hezkidetzaren inguruko zer nolako lanketa egiten den aisialdi espazioetan eta hezkidetza hori nola egiten den.

Datu bilketa egiteko aisialdi taldeetako hezitzaileen iritziak jasotzeko galdetegi bat –4o erantzun jaso ziren–, eta eguneroko errealitatea sakonago ezagutzeko sei lan saio egin dituzte. Saio horietan parte hartu dutenak dira: Euskarabentura, Itaka Eskolapios, Gipuzkoako Gaztetxoak, Geu elkartea, Arabako Eskaut Laikoak eta Goian elkartea.

Ondorio nagusiak

Formakuntza premia eta hezkidetza egoki lantzeko erreminta/baliabide egokien gabezia identifikatu dira. Hala, lanketan parte hartu duten hezitzaileek formakuntza eskatu dute bai hezitzaileentzako bai haur eta nerabeentzako, eta materiala egokia.

Horrekin batera, onuragarria ikusten dute hezkidetza arduradunaren figura sortzea eta gaiaren inguruan hausnarketa espazioak zabaltzea. “Gutxitan hitz egiten dute udalekuetan ematen diren gertaerak genero-perspektiba kontuan izanda. Hau da, zein ahots gailendu den gehiago (neskarena edo mutilarena) eta zer egin hori berdintzeko; zeinek okupatu duen espazioa gehien (neskak edo mutilak) edota hezitzaileek zein jarrerarekin zuzendu zatzaizkien (neskei edo mutilei) zuzendutako formazioa eskatu dute”, irakur daiteke txostenean.

Identitate berriak ezagutzea eta horien gainean izan beharreko jarrera eta diskurtsoak lantzea ere premiazkotzat jotzen dute. “Pertsonei ezaugarriak berez ezartzearen ideia hautsi eta ikuskera zabaltzea ezinbestekoa izango da esku-hartze egoki bat garatzerako”.

Administrazioari zuzendutako eskaerak ere jasotzen ditu txostenak. Hala nola, hezkidetza plan bat osatzea, partaidetza espazioak irekitzea, material eta euskarriak sortzea, praktika onak garatzeko gidak sortzea, eta hezkidetza lantzeko aisialdi taldeei diru-laguntzak ematea.

“Balioetan heztea hezkuntza formaletik haratago doan zerbait da, bizitzako esparru anitz ukitzen ditu: familia-egitura, astialdia, eskolaz kanpoko ekintzak, jolasak, telebista… Zentzu honetan, hezkidetzak toki berezitu, antolatu eta estrategikoa hartu dezake pertsona baten jokabidean eragiteko”.

Formakuntza zikloa

Haziak Astialdira txostenaren inguruan egindako lanketak agerian utzitako gabeziei aurre egiteko aisialdiko hezitzaileei zuzendutako formakuntza ziklo berezitu bat antolatu dute Euskadiko Gazteriaren Kontseiluak, Alboan GKEak eta Errotik kooperatiba feministak beste hainbat eragilerekin elkarlanean.

Bina orduko bi tailer dira. Lehen tailerrak Hezkidetzan Hezten du izena eta Bizkaiko Urtxintxa Eskolak emango du. Bigarrena, berriz, Astialdian maskulinitateak landuz da eta Hiruko Larroxa Kooperatibak gidatuko du. Bilboko Hika ateneoan egingo dituzte apirilaren 27an eta 29an, eta Gasteizko Landatxo Gizarte Etxean maiatzaren 4an eta 6an. Ordutegia, kasu bietan, 18:00etatik 20:00etara da.

Izena emateko aukera zabalik da hemen.