Irakurtzen zabiltzan hori. Laguna, zer esango dizut ba. Ederra bezain gogorra da gurasotasuna, zen, da eta izango da. Ondo dakigu. Zenbatu genitzake erronkak: kontziliazioa, loa, norberarentzako denbora, pazientzia, haurrarekin hartu-emana, bikote-harremana, garai bakoitzeko erronka ideologiko eta praktikoak eta, batez ere, gu geu, norbere burua eta mundu honetan daukagun paper berria. Haur txikia ispilu handia delako begiz erakusten ez ditugun ahulezia, intseguritate eta enparauak islatzeko, noiz eta gure onena eman behar eta eman nahi dugunean.

Oraindik umedun, zain, irakurtzen hasi nintzen (bukatu gabe) liburu gomendatu batzuk, gurasotasunaz printzipioz, baino amatasunaz gehiago jarduten dutenak. Amaren garrantziaz. Salbuespenak salbuespen, ama izan delako benetan guraso, hitz larritan (gurasoren etimologia ilunean “atsoa” balego), eta amek erosi izan dituztelako halako liburuak, edo hobe esanda, nahikoa desentenditu garelako aitak zaintza gai honetan beste hainbatetan bezala.

Handia da Internet, dena irensten duen zuloa. Baina, erraldoitasun horretan ere, nekeza da, anekdota, aitatasun berriei buruzko oharrak, edukiak edota pasatzen ari den 2021erako erreferenteak aurkitzea. Euskaraz, noski, baina ez euskaraz soilik. Egin aproba txiki bat, fatherhood: 17.100.000 emaitza; motherhood: 60.000.000. Bat-hiru ratioa. Guraso.eus-en 26 artikulu daude aitatasuna aipatzen dutenak eta 62k amatasuna. Bikoitza baino gehiago.

Etxean izan ditugu aurretik aita onak, gizon onak, Ritxar Bacete-ren “hombre buenos” horiek, baina erreferente bezala nahiko kamuts dira gaur egungo ertzetarako. Erreferente berriak behar ditugu, eta praktikatik teoriatik baino gehiago. Kuriosoa iruditu zitzaidan Dads dokumentala (AppleTv-n), etxean ume-zain geratzea erabaki duten herrialde ezberdinetako aiten adibideekin.

Ulertzen dut gure belaunaldiari, zuri eta niri, tokatzen zaigula belaun lan berria eta bisagra lana beti da gogorra, galdetu bestela emakumezkoei. Guraso.eus plataformak iruzkinetarako tartea badaukanez hemen azpian, artikulu honekin eman baino jaso nahiko nuke, ziur ni baino gehiago dakizuen gurasoek irakurriko duzuela. Ea erreferentzia batzuk eman ahal dizkidazuen. Ederrago delako aitatasuna ere taldean. Esker onez.